Министерот за образование во заминување Пиштар Љутфиу ги разочара учениците и наставниците и од нив побара да се подготват за екстерното тестирање, објави Алсат. Оваа изјава на Љутвиу доаѓа како одговор на дилемата на учениците, ќе има или не екстерно тестирање за оваа учебна година. Мандатарот Зоран Заев, најави дека новата Влада ќе го укине екстерното тестирање, веднаш штом Собранието почне да работи
„Силно верувам дека новата влада нема да донесе закон против граѓаните и учениците во Македонија, затоа би апелирал учениците да се подготват за екстерно тестирање бидејќи донесувањето на законите на се случува преку ноќ, туку треба да биде во консултација и со правниот сектор со правните експерти за да донесе добар закон. Потоа законот ќе мора да помине на комисии, ќе треба во Парламент, па верувам дека ќе треба да помине извесно време по доаѓањето на новата влада. Затоа, повторно апелирам дека и покрај желбите на СДСМ да се донесе законот за укинување на екстерното тестирање, потребно е време“, рече министерот во заминување, Љутфиу.
Основните и средните училишта во земјава ги прават последните подготовки за спроведување на екстерното, а директорите на училиштата информираа дека техничкиот дел на подготовките е завршен. Од Државниот испитен центар ги објавија датумите кога ќе се полага, а тоа се 5, 6, 8 и 9 јуни. Подготвени се 450 илјади прашања за сите предмети кои до 15 мај беа јавно прикажани.