Македонија е форма испразнета од својата содржина. Сега е мртва птица наполнета со слама од патетични фрази и стои закачена во Штабквартирата на вмро.
Бранко Тричковски
Единствената разлика меѓу лудите и мене е во тоа што јас не сум луд.
Можеби малку претерувам затоа што и на страната на мојата маленкост има некои благи симптоми.
Хахаха!
Но, општеството нема да можам да го стигнам, тоа е сигурно.
Тоа е качено на стапот на Мондо Дуплантис.
Го оставам да гори исчистено од дух, емоции на слободниот човек и памет, за ронка блискост до власта, во моралниот пожар, во кој вчера изгоре остатокот од Кочани, пет шестини од Скопје и седум осмини од државата.
Ги оставам да поживеат малку во ренесансата, на Леонардо М., во држава која е трета по економија во Европа (!?), и со гигантски чекори оди напред.
Кон својот крај.
Луѓето гледаат на вчерашните резултати како на успех на вмро и пораз на сдсм, што е неспорно, но јас мислам дека е грешка на тоа поведение на гласачкото тело да се гледа како на политичка епизода која следниот пат може да се заменни со епизода во која односот на силите може да се промени.
Мислам дека состојбата на нацијата е драматична. Не само што нема политички актери кои можат да ги сменат катастрофалните процеси, туку нема ниту инструменти, а што е најважно, нема народ со кој би можело да се работи.
Менталните деформации се трајни и непоправливи. Македонија е форма испразнета од својата содржина. Сега е мртва птица наполнета со слама од патетични фрази и стои закачена во Штабквартирата на вмро.
Ја симнуваат за прошетки по локалните телевизии и портали.
До скоро мислев дека кога народот ќе тресне во ѕидот на актуелнава политика, во моментот кога таа ќе снема ресурси да ги сервисира елементарните потреби и интереси на граѓаните, што веќе е случај, ќе се случи некакво освестување и борба за промени, но сега мислам дека дури тогаш нема да мрднат со прст.
Не само мртвите под ѕидот.
Еднаш напишав дека јас во секој случај ќе бидам победник. Мислев ако Македонија победи- поради победата, а ако загуби, што сега е извесно, затоа што ќе загуби и ќе ме ослободи од себе.
Тонам во меланхолија.
Креативна.
Не сум лут, нити сум загрижен.
Кршете глава вие што вчера победивте или бевте поразени.
Изборите се анален термометар кој покажува колкава е лудоста на нацијата.
Нашата, односно вашата, демек македонската, е 43 со 5.
Лепота живуленија!
Од Фејсбук ѕидот на авторот