Во Македонија има двојно помалку разводи од просекот на 27-те земји членки на ЕУ. Во земјава преклани имаше само 0,85 разводи на 1.000 жители, што е над два пати помалку од ЕУ, каде стапката на разводи е 1,9 на 1.000 жители, покажуваат последните податоци на Еуростат.
Од македонската стапка помалку разводи има само во Ирска (0,7 разводи на 1.000 жители). Причина за ова е специфичната ирска традиција во однос на браковите помешана со католицизмот. Сепак, во друга, исто крајно католички конзервативна земја како Полска, на пример, бројот на разводи е повторно двојно поголем од Македонија и изнесува 1,7 на 1.000 жители.
Стапките на Балканот се пониски, а со Македонија слична стапка на разводи има само Црна Гора со 0.8 разводи на 1.000 жители. Хрватска има 1,3 разводи, а Бугарија 1,4 на 1.000 жители, што значи далеку повеќе од Македонија.
Според статистиката, 12 отсто од браковите во земјава завршуваат со развод (2011 година), а дури две третини од разводите се меѓу сопружници на над 30-годишна возраст.
Владиката Петар во изјава за 24 Вести завчера предизвика бројни реакции кога рече дека во земјава имало голем број разводи и дека тоа се случувало и кога браковите се склопени во црква. Тој додаде и дека жената е „подвластена“ на мажот, истовремено истакувајќи дека жените имале поголеми права од мажите.