Македонија на 8 октомври ќе ја добие шестата по ред препорака за почеток на преговорите. Со оглед на ситуацијата во земјата карактеризирана со сериозна политичка криза и нов уназадување на демократските процеси во ЕК се уште постојат дилеми околу формулацијата на оваа препорака која во долгата серија препораки ќе биде првата која сериозно ќе обрне внимание на незадоволството на земјите членки од развојот на ситуацијата во државата.
Во таа смисла препораката која ЕК ќе ја упати до Европскиот совет ќе биде или условена со подобрување на состојбите, пред се на демократите перформанси до декември кога Европскиот совет ќе ја разгледа оваа препорака, или пак таа ќе содржи квалификации кои јасно ги посочуваат слабостите во државата.
Комесарот Филе, велат за НОВА дипломатски извори, не би сакал да ја напушти функцијата со одземање на препораката што во голема мерка би го ограничило маневарскиот простор на неговиот наследник Јоханес Хан.
Вториот проблем пред кој е исправена ЕК, според анализите кои се направени, е тоа што ваквата одлука за одземање би преставувала преседан во европските интеграциски процеси.
Третата поента на анализата правена во европските дипломатски кругови во случај на одземање на препораката е ризик од дестабилизација и влошување на меѓуетничките односи во драматична насока.
Конечно во анализата е посочено и тоа дека, ако се следи оваа логика на одземање на препораката, тешко е да се брани и понатамошното продолжување на преговори со земја како Турција во која дојде исто така до криза на демократските перформанси на таа држава а во тој контекст се гледа и на состојбите во Србија и Црна Гора кои веќе го започнаа преговарачкиот процес.
ЕК како што сметаат во Брисел го бира помалото од двете зла но и понатаму без решение за тоа како да го одржи влијанието на европските интеграциски процеси кое во земјите на источна и централна Европа донесе драматично подобрување како на демократските така и на економските перформанси на тие земји.
Останува да се види како ЕК до наредната среда ќе ја формулира оваа шеста по ред препорака на начин кој Извештајот за напредокот ќе го ангажира во функција на будење на реформските процеси и спасување на загрозениот политички консензус околу европската агенда.
Изминатите пет препораки за жал беа искористени во функција на дневно политички маркетинг со што сериозно е доведен во прашање кредибилитетот на европските институции и Извештајот за напредокот како еден од основните алати за стимулирање на трансформација на општеството во насока на негово прилагодување кон европските стандарди.