Министерството за правда информираше дека постои правен основ Македонија да побара екстрадиција од Унгарија за екс-премиерот во бегство, Никола Груевски. Министерството информираше дека преку други правни акти ќе се бара испорачување на поранешниот македонски премиер затоа што Македонија нема договор со Унгарија за екстрадиција.
Барањето за екстрадиција е во подготовка и се собира потребната документација. Се очекува во скоро време да биде испратено до Унгарија.
МВР отвори две истраги за овој случај, а со нив треба да се утврди како избегал Груевски и дали некој од полицијата му дал помош.
Македонија и Унгарија во март годинава склучиле договор за полициска соработка.
Правните акти преку кои ќе се бара екстрадицијата на Груевски се Законот за меѓународна правна соработка во кривичната материја, Европската конвенција за екстрадиција од 1957 година и одредбите од Договорот меѓу СФРЈ и Народна република Унгарија за заемна правна помош од 1968 година, пишува Макфакс.Македонија нема таков договор ни со Грција, но и во случајот со бегалците Горан Груејвски и Никола Бошковски кои пребегнаа во Солун, македонските правосудни органи се повикаа на други правни акти во барањето за екстрадиција.