Македонија денес остави непријатен впечаток пред еврокомесарот за проширување Штефан Филе, кој, според неговите зборови ќе се одрази и на пролетниот извештај на Европската комисија за земјава. Филе најпрво се изнервира утринава на собраниската седница на Националниот совет на евроинтеграции кога изнервирано им се обрати на присутните пратеници кои се препираа околу тоа кој е виновен за состојбите во земјава, особено околу прашањата за изборите.
„Вие го избравте датумот за овој дијалог на високо ниво по изборите, а не јас, иако знаевте дека се уште ќе биде тензично. Иако се уште живеете во времето на изборите, имате шанса да ми помогнете за што попозитивен и пообјективен извештај во Брисел. Да ни помогнете нам за да ви помогнеме вам“
-Барате одговорност од ЕУ! Јас сум одговорен. Затоа трет пат сум тука! За да покажам одговорност и посветеност. Ние сме заинтересирани за напредокот и таа е таа агенда. Но вие… Некои од вас не се во таа насока! Имиџот на Македонија не се подобрува, ни во Брисел, ни кај земјите членки!“, речиси бесно порача Филе додавајќи дека ова што денес го слуша и гледа се информации кои ќе влезат во пролетниот извештај.
Подоцна, на заедничката прес конференција со премиерот Никола Груевски, Филе уште еднаш повтори дека сликата која денес ја оставија претставниците на политичките сили иќе се најде во извештајот.
„Со ажурирани информации од ова што го слушнавме денеска, извештајот ќе излезе следниот вторник“, рече Филе.
Во однос на напредокот постигнат во рамки на Дијалогот на високот ниво, Филе порача дека е важно да се прејде во фаза на имплементација на законите. Се осврна и на медиумите и побара од Владата да се ангажира во продолжувањето на дијалогот со новинарите, кој по настаните од 24 Декември беше прекинат.
„Запомнете дека бранењето на слободата на медиумите е основа во демократијата. Прелиминарниот извештај на ОБСЕ/ОДИХР за известувањето на медиумите за изборите само го зајакна овој аргумент со што ги наброја помеѓу недостатоците пристрасното покривање од страна на медиумите на овие настани. Поради тоа, властите треба да обрнат внимание на овие прашања“, рече Штефан Филе.
Премиерот Никола Груевски рече дека ќе Македонија останува на патетката на европската агенда и дека е задоволен од постигнатото во рамки на дијалогот на високо ниво со Европската комисија.
„Ние ќе продолжиме со посветен однос на градењето и интензивирањето на реформите, во надминувањето на предизвиците и во понатамошно унапредување на сите сфери во општеството со цел подобар и поквалитетен живот “, рече премиерот
Еврокомесарот за прширување Штефан Филе кој дојде во Скопје заради финализирање на пролетниот извештај на ЕК за Македонија, денеска треба да се сретне со премиерот Никола Груевски и со вицепремиерот задолжен за европски прашања Фатмир Бесими. Во Владата ќе се одржи нова рунда од пристапниот дијалог на високо ниво.