Македонија во најновиот Глобален индекс на мирот што е објавен денеска е рангирана на последното место во регионот, а заедно со Турција ги дели последните две места во Европа.
Македонија го зазеде 79 место што е за 11 места подолу од лани. Станува збор за анализа на Институтот за економија и мир со која се рангираат земјите според нивниот мир и со која се идентификуваат потенцијалните детерминанти на мирот.
Исланд го зачува статусот на најмирна земја, додека на дното на списокот е Авганистан.
Во образложението се наведува дека Македонија страдаше од лошите односи со нејзините соседи, во облик на, како што се вели, територијален спор со Грција и обвинувањата од Бугарија дека Македонија бара соодветен дел од бугарската историја. Тоа ги водеше шефовите на дипломатии на двете земји да го одложат одредувањето датум за отворање преговори за влез на Македонија во Европската унија, јавува Радио Слободна Европа.
Внатрешните тензии меѓу етничките Македонци и етничките Албанци остануваат проблематични, иако е малку веројатно дека е можно враќање на меѓуетнички вооружен конфликт во земјата, се наведува во образложението на анализата.
Во Глобалниот индекс кој е составен од индикатори кои го мерат отсуството на насилство во општеството се земаат предвид и надворешните и внатрешните фактори, во него се опфатени 162 земји или 99 насто од светската популација.
Според годинашиот Глобален индекс, најдобро пласирана во регионот, односно на 28 место е Хрватска, Србија на 62, Босна и Херцеговина на 71, по што следат Косово и Црна Гора.
Европа го задржа рејтингот на најмирен регион, а 13 европски земји се најдоа на првите дваесет места во светот. На врвот и годинава е Исланд.