„Судот во Стразбур не предлага мерки, остава на самите држави да ги дефинира, и во согласност со правилата на Советот на Европа, Македонија има должност да ја изврши пресудата во случајот „Ел Масри“ и државата ќе го направи тоа“, изјави вчера директорот на Бирото за застапување на Македонија пред ЕСЧП, Костадин Богданов.
Според Богданов индивидуалните мерки што треба да се преземат подразбираат дека Ел Масри треба да се обесштети на некој начин.
– Покрај исплатата на парите што му беа досудени на Ел Масри, треба да се преземат и други мерки во насока на извршување на одлуката – вели Богданов, притоа не наведувајќи кои се тие мерки.
Оштетата од пресудата за случајот „Ел Масри против Македонија“, донесена кон крајот на минатата година, изнесува 60 000 евра со заклучок дека Македонија ги прекршила човековите права со тоа што го уапсила и незаконски го држела скриен либискиот Германец Калид ел Масри на тајна локација во Скопје.
Во 2009 година, Калид ел Масри, во Стразбур поднесе тужба против Македонија, во која се жали дека македонската полиција кон него се однесувала нечовечки и понижувачки, дека му била загрозена слободата на изразување, како и тоа дека му било загрозено правото на семеен живот и правото на правично судење.
Освен правото на слобода на изразување, судот тогаш ги прифати сите аргументи на адвокатите на Ел Масри.