Според проценката на бројот на население, на крајот на минатата година во земјава имало 2.076.255 милиони жители, што е за 7.083 лица повеќе во однос на 2014 година и 23.533 лица повеќе во однос на 2009 година. Во периодот од 2009 година до 2019 година се забележува континуирано зголемување на доселените странци. Податоците на Државниот завод за статистика (ДЗС) покажуваат дека во истиот период, бројот на живородените деца е намален, а бројот на починатите лица е зголемен.
Во однос на старосната структура, македонското население сè повеќе старее. Во периодот од 2009 година до 2019 година, учеството на младото население (0-14 години) во вкупната популација во земјава е намалено од 17,7 на 16,2 отсто, а учеството на возрасното население (65 и повеќе години) е зголемено од 11,6 проценти на 14,5 отсто.
Во периодот од 2009 до 2019 година, ДЗС бележи намалување на бројот на живородени деца за 3.839 или за 16,2 отсто. Промените во старосната структура на населението имаат своја рефлексија и врз бројот на починатите лица во земјата. Бројот на починати придонесе за зголемување на стапката на морталитет која во 2019 година изнесува 9,8 отсто (починати на 1000 население).
Според податоците на ДЗС, лани во земјава се регистрирани 19.845 живородени бебиња и 20.446 починати лица, со што природниот прираст е негативен и изнесува – 601.