Македонската држава не сака да споделува со јавноста како ги троши народните пари. Според глобалното истражување “Индекс на буџетска транспарентност”, земјава е во друштото на оние кои не сакаат да споделуваат информации за буџетот со јавноста.
Индексот е 34, местото е број 68, полошо од лани, а во табелата на држави со минимум транспаретност друштво ни прават Буркина Фасо, Сиера Леоне и Ангола. Дурии новинарите кои долги години следат економија имаат проблем да ги добијат сите информации. Како што се објаснува и во истражувањето, кај нас се објавува само буџетот, но не и детални информации за него, ниту пак и други пропратни документи.
“На пример, ќе видите ставка стоки и услуги. А ниту збор што се тие стоки и услуги. Тоа се милиони евра од буџетски пари.Министерството за финансии прекина да ја објавува и завршната сметка за тоа како се трошеле парите од буџетот минатата година. Тоа се случува прв пат во земјава. Значи,имаме буџет, ама немаме увид во неговата реализација”, вели Ида Протуѓер, новинар во неделникот “Граѓански”.