Македонската Армија испрати уште еден тим за помош на настраданите во Турција 

Дополнителен армиски состав од 36 припадници од Баталјонот за
специјални сили обучени за спасување и пребарување во урнатини, денеска во
претпладневните часови од касарната „Илинден“ во Скопје замина во Република
Турција, каде ќе учествува во хуманитарната операција во областите кои се
најмногу погодени од катастрофалните земјотреси.
На испраќањето на дополнителниот тим од Армијата, од страна на началникот на Генералштабот Васко Ѓурчиновски им беше порачано најпрофесионално да го вложат севкупниот свој потенцијал и обученост и да помогнат на граѓаните на сојузничка Турција.
Армискиот тим замина по донесената одлука на Владата за испраќање
дополнителна помош, а на предлог на Министерството за одбрана.
Во меѓувреме армискиот тим, кој се наоѓа во градот Кахраманмараш,
непрекинато е ангажиран во активностите за пребарување на теренот, пронаоѓање
и извлекување на евентуално преживеаните, кои се наоѓаат во рушевините
настанати од катастрофалните земјотреси.