Македонија одлучи да не учествува на конференцијата на парламентраните комитети за европски работи помеѓу ЕУ и земјите кандидати која неделава се одржува во Даблин во организација на ирското претседателство. “Навистина е штета што македонската делегација не е тука.
Ова е пропуштена прилика бидејќи тоа за пратениците беше одлична прилика да се лобираат за својата земја кај нивните колеги од земјите на ЕУ“, вели за Нова поранешниот ЕУ амбасадор во Македонија Ерван Фуере кој исто така учествува на конференцијата.
Со оваа конференција Ирска ја покажува својата поддршка за процесот на проширувањето и покрај тешките економски услови со кои Европа се соочува.
Инаку процесот на проширувањето денес е на агендата на сесијата на министрите за надворешни работи на ЕУ во Луксембург. Министрите ќе разговараат за Балканот и напредокот на овие земји како што беше најавено во текот на самитот на ЕУ во декември 2012 година.
Се очекува да биде одобрено отворање на преговорите за Договор за стабилизација и асоцијација со Косово и да се дадат насоки за преговорите со Србија кои, според најавите, можат да бидат отворени кон крајот на годината.
“Што се однесува до Македонија јасно е дека продолжените рокови за примена на договорот од 1 март и пропуштената шанса да се подобри имиџот на македонското собрание и демократските процеси во земјата од 24 декември, се голем товар за многу земји членки.
Оттука расположението за било какво поместување во однос на Македонија на ЕУ агендата не е позитивно. Но нема сомнение исто така дека ЕУ сака да ги почне преговорите со Македонија колку што е можно побрзо“, вели Фуере.
Според дипломатите во Брисел Македонија очигледно нема да се најде ни на дневниот ред на самитот кој на крајот на неделава го затвора ирското претседателство со ЕУ.
Дипломатски соговорници на НОВА A тврдат дека дипломатските активности на Македонија во Брисел се сведени на минимум наместо да бидат засилени за да ја поправат оваа ситуација.
Во македонската мисија при ЕУ амбасадорот и голем дел од дипломатите се отсутни од Брисел во текот на овие недели клучни за добро позиционирање на земјата во ЕУ и се поставува прашањето дали тоа отсуство е израз незаинтересираноста на Македонија за европскиот напредок.