Македонија одново ја издаде седумгодишната еврообврзница со камата од 5 проценти, објави Ројтерс.
Тргувањето со еврообврзницата чија максимална вредност е 650 милиони евра беше одложено минатиот четврток откако член на опозицискиот СДСМ упати писмо во кое го покрена прашањето за правна надлежност за нејзино издавање.
Дека еврообврзницата повторно ќе биде издадена потврди и вицепремиерот Владимир Пешевски во изјава за телевизија Канал 5 пред неколку дена, кој според СДСМ веќе ја презел работата околу нејзината реализација, наместо министерот за финансии Кирил Миновски.
Пешевски во изјавата рече дека со писмото на Кире Наумов од СДСМ кој ги преупреди банките за задолжувањето, се прави штета на репутацијата на земјата.
-Со тоа писмо се нанесува голема штета на Република Македонија, бидејќи еврообврзницата се издаваше за период од две години, значи не требаше сите средства да се употребат само за оваа година, туку и за следната. Со ова се нанесува огромна штета на репутацијата на Република Македонија бидејќи и покрај тоа што не постоeја правни пречки за издавање на еврообврзницата сепак инвеститорите и советници, сите вакви написи ги следат со крајно внимание и ќе биде потребно сега да бидат дополнително уверени дека не постојат пречки за нејзино издавање, вели Пешевски.
Кире Наумов на прес конференција рече дека процесот на издавање на еврообврзницата е одложен, но не и прекинат.
Тој вели дека власта побарала правно толкување за важноста на целата постапка од страна на Министерството за правда кое ќе биде испратено до банките за тоа дали е неопходно толкаво задолжување, мислење кое согласно Законот за јавен долг требало да биде издадено пред носењето на одлуката за задолжување.
Тој потенцира дека доколку се издаде еврообврзница истата таа треба да се издаде со постапка со која беше издадена во ноември 2015г. Сепак, тој истакна дека за да може да каже колку конкретно и е потребно на задолжување на Македонија во овој момент, треба да има барем минимум увид во Министерството за финансии – ингеренции кои на Наумов му се одземени по оставката на местото дополнителен заменик министер.
Водечки банки агенти кои ќе тргуваат се Ситигруп, Дојче банк, Ерсте груп и Сосиете женерал.