Силна поддршка за евроинтегративниот процес на Република Северна Македонија изрази францускиот претседател Емануел Макрон на средбата со македонскиот државен врв.
„Вашата земја заслужува да ги почне преговорите со ЕУ без одложување. Време е да се конкретизира ова одлука и ние ќе работиме да се најде решение за почеток на преговорите“, истакна Макрон на заедничката прес конференција со премиерот Зоран Заев.
Премиерот Заев се заблагодари за силната поддршка од Франција и посочи дека претстојниот Самит во јуни е можност да се дојде до решение кое ќе ја отргне блокадата од патот на Северна Македонија кон Унијата.
„Денешната средба ги збогатува нашите билатерални врски во годината кога одбележуваме 28 години од воспоставувањето на дипломатски односи помеѓу Северна Македонија и Франција. За нас е многу важно што Франција го поддржува процесот на интеграција на Северна Македонија во ЕУ, со јасно поставени стандарди и без да се губи време. Пред нас е Самитот на Европскиот совет во јуни, кој е вистинска можност за чекор наред и за решение кое ќе ја оттргне блокадата на нашиот европски пат“, рече премиерот Зоран Заев.
Премиерот Зоран Заев заедно со вицепремиерот за европски прашања Никола Димитров и министерот за надворешни работи Бујар Османи вечерва се во Париз на работна средба со претседателот на Франција Емануел Макрон.
Со посетата се одбележуваат 28 години од воспоставувањето дипломатски односи меѓу двете земји, а во рамки на посетата двете делегации имаа работна вечера во Елисејската палата.