По „маршот“ на сезонските работници – туристичка стража како дел од проектот Скопје 2014, поповите кои стојат пред спомениците на македонските просветители станаа цел за дискусија во јавноста.
„Пред спомениците на нашите првоучители свети Кирил, Методиј, Климент и Наум, туристите може да се фотографираат и со лица во облека налик на одеждите на православен свештеник. Тоа е само уште една хула во низата понижувања кон светото православие во Македонија, упатена од оние кои наводно го бранат“ реагираат на интернет православните верници.
Европскиот метрополит Пимен, на својот профил на Фејсбук уште вчера реагираше за претставителноста на стражарите.
„Разбирам антички војници, комити и партизани ама и маскирани демек попови? Тоа е сеуште постоечка професија и ако некој има желба да се слика со свештеник, ете му ја на 50 метри црквата св. Димитриј. Едно, недолично е да се поигруваме со верата и професијата, а друго, има ли тој што ги облекува поим како изгледа свештеник? Влегол ли во манастир или црква или само гледал Македонски народни приказни“, напиша владиката Пимен во реакцијата.
Не биле попови, туку македонските просветители, браќата Кирил и Методиј, се јави денес директортката на скопскиот Детски културен центар, Ружа Ѓорѓевска, која за Плусинфо изјави дека поради свои обврски не успеала на време да ја спречи грешката.
– Станува збор за мала грешка. Двете момчиња кои на плоштадот Македонија до вчера носеа свештена облека, требало да бидат облечени во облека која ја носеле македонските просветители. Во МТВ по грешка им дале попска облека, згора и петрафил, па настана проблем. Децата биле во МТВ, и таму костимографот им ја дал облеката. Поради мои обврски не успеав да ја видам. Вчера за овој проблем се крена голема врева. Денеска дадов наредба веднаш да се промени облеката, а додека тоа не биде сторено, поповите нема да бидат на плоштадот „Македонија“ – изјави Ѓорѓевска.
Идејата од проектот е маскираните да стојат цело лето на плоштадот, и да ја надополнат сликата за хероите на кои власта им постави спомен обележје.