По 74 дена поминати на Универзитетската Клиника за гинекологија и акушерство – Скопје, предвремено роденото бебе Викторија си замина дома.
Убавата вест преку Фејсбук ја споделија од Клиниката.
Мајката била прворотка, а на ЈЗУ УГАК била хоспитализирана пред Нова Година, во ризична бременост. Се породила спонтано, во 26 гестациска недела од бременоста на 4 јануари. Викторија се родила со екстремно мала тежина од само 700 грама, со должина од 28 сантиметри.
„Во периодот на престој на нашите одделенија, новороденото имаше комплексен третман. Во интензивниот третман применета е механичка вентилациона поддршка во првите 21 ден од раѓањето. Потоа новороденото беше ставено на кислородна поддршка со неагресивна механичка вентилација до 67-от постнатален ден, со постојан мониторинг на виталните функции и кислородна заситеност со пилсоксиметрија и гасни анализи. На бебето му се направени сите скрининзи кои се пропишани во Националната програма на Министерството за здравство и го испративме од ГАК со прецизни поуки за контрола и за следење на растот и на развојот“, стои во објавата на Универзитетската Клиника за гинекологија и акушерство – Скопје.
На 18 март бебето било испишано од болница со 2200 грама телесна тежина.
„Нашата најмала хероина во 2022 година првпат влезе во својот дом во Скопје изминатиот петок, по 2,5 месеци поминати на неонатолошките интензивни одделенија на Клиниката за гинекологија и акушерство – Скопје. Тимот од педијатри, медицински сестри и акушерски секојдневно ја следеа нејзината здравствена состојба и заедно со новороденото ги добија сите предизвици кои се испречуваа пред нив“, стои во нивниот пост.