Советот на министрите на ЕУ во јуни ќе реши дали ќе даде годинава зелено светло за старт на преговори за членство за Македонија врз база на анализата на ЕК за демократските и реформски процеси и состојби во Македонија како и за напредокот во спорот со името.
Според професорот Денко Малевски, мали се изгледите Македонија да направи прогрес во спорот со името како и во полтичкиот дијалог на кој инсистира Европската комисија. Својата оценка професорот Малевски ја изнесе во интервју за Радио Слободна Европа.
“Партиите во Македонија и во најтешките моменти за државата не беа во состојба да седнат и да разговараат. Повикот за дијалог кој доаѓа од надвор е всушност повик да се изгради единствен став на државата, зашто само така може да има ефект нашата надворешна политика. Таква беше ситуацијата на раздробеност, скараност, желба да се уништи противникот пред 20 години, таква е ситуацијата и денеска. Ако тоа се има предвид се поставува прашањето како тоа една држава која не е во состојба дома да разговара меѓу себе, може да разговара со кого било надвор” вели Денко Малевски во интервју за РСЕ.
Спорот за името според Малевски дополнително го компликува и фактот што како во Грција така и кај нас доминира националистичкиот концепт.
“Ова е судир на два национализми. Кога од двете страни на границата би живееле либерално настроени луѓе во некој замислен свет, тие од грчката страна сигурно не би имале приговор што ние го употребуваме терминот Македонија и што ние се нарекуваме Македонци. Кога би живееле либерални умови од оваа страна на границата кај нас, тие сигурно не би се срамеле од својот словенски јазик и дека нивниот базичен идентитет, како и јазикот е словенски, туку да се повикуваат на некакви си расистички теории за антика и за некакви си супер-луѓе од кои што потекнуваме. Кога би било така, ама не е така. Имаме судири на два национализми коишто она што примарно беше проблем, разграничување меѓу новата држава Македонија и грчката провинција Македонија, тогаш пред 20 години, сега прерасна во еден комплициран проблем на спор околу идентитетот, кои се вистинските Македонци? Дали ние од оваа страна или грчките Македонци од другата страна, кои се реинкарнација на античките Македонци, во основа еден глупав спор” вели Денко Малевски во интервју за РСЕ