Малезискиот авион кој се урна во Украина се распаднал на делови уште за време на летот, откако бил погоден со бројни објекти со голема брзина, стои во извештајот објавен денеска во Холандија.
„Авионот на летот МХ17 се распаднал во воздух, веројатно како резултат на структурно оштетување предизвикано од бројни објекти со висока енергија, кои навлегле во авионот однадвор“, се вели во првичниот извештај за несреќата во која загина 298 луѓе, најголем дел холандски државјани.
Во извештајот на холандскиот одбор стои дека Боингот 777-200 бил во исправна состојба пред неговото полетување од Амстердам, a бил управуван од квалификуван и искусен екипаж. Авионот немал никакви технички проблеми.
Самиот факт што авионот бил погоден од предмети со висока брзина, се објаснува ненадејниот крај на регистрирањето податоци од црните кутии, како и губење на контакт со контролата на летање и исчезнувањето на леталото од радарот, се вели во извештајот кој содржи 34 страници.
Резулатите од истражувањето се базирани врз информации од црните кутии, фотографии и видеа снимени на местото на несреќата, како и информации обезбедени од украинската служба за контрола на воздушниот сообраќај.
Истражителите не беа на местото на несреќата поради војната што се води во регионот.
Целосниот извештај за несреќата се очекува да биде направен до средината на 2015 година.
Боингот беше соборен на 17 јули над источна Украина , а леташе на релација од Амстердам -Куала Лумпур.