“Зошто си тука? Зошто фрлаш камења по автобуската? – Не знам. Ме викнаа другарите , сите дојдоа, и јас затоа дојдов”, одговара на нашето прашање едно од малолетните деца кои денес групно тргнаа од Јахја Пашината џамија кон Владата за да протестираат.
“Колку години имаш? – Осум. “, вели малото црнокосо момче во црн дуксер со качулка.
“Твоите родители знаат каде си?”, го прашувам. Наместо одговор следеше мала итра насмевка и детето премина на другата страна на булеварот кај поликлината Битпазар. За помалку од минута истото дете со дел од групата малолетници фрлаа камења кон големиот жолт билборд во функција на изборната кампања на партијата ВМРО ДПМНЕ.
Иако сликите од денешните протести ни оддалеку не наликуваа на оние од петокот и саботата, кога прво македонските, а потоа и албанските млади протестираа, , сепак, остана горчливо чувство од глетката на двесте деца, од 7 и 8 па до 16 години кои кршат и каменуваат.
За собирот пред џамијата кој требаше да резултира со протести пред владата, јавноста дозна од социјалните мрежи каде се упатуваа повиците. По пладневната молитва требаше да се тргне кон
Владата за, според пишувањата на мрежите, да се изрази незадоволство поради нападите врз Албанци кои се случуваа неделава низ Скопје. Некои од постарите присутни верници пред џамијата се обидоа да ги одвратат младите од намерите да протестираат, но безуспешно.
„Зошто да протестираме ние луѓето и младите да се тераат на ова, нека дојдат тие сите политичарите да разговараат со нас. Никој не треба никаде да оди“, рече еден од присутните верници.
Пред собраните новинари пред џамијата изјава даваше Шефкет Дереку, кој се претстави како загрижен верник, иако не стана јасно од неговата изјава дали тој е дел од повикот за протестите или не.
„Се собрале младите, сакаат да протестираат, тепаа деца Албанци цела недела. Но, нема да протестираме, ова не е добро. Ние не сакаме да одиме таму и не одиме веќе, нека дојдат тие политичарите тука да разговараат со нас во четири очи“,
Иако не успеаја да стигнат до Владата поради силното полициско обезбедување, малолетниците, на кои подоа им се придружи и помала група постари, направија штети. На потегот од Мавровска па се до мостот кај поликлинината Битпазар фрлаа со камења по полицијата, кршеа билборди, се каменуваа автобуските станици, а некои од камењата завршија и врз стаклата на околните дуќани, но и новинарите.
Групата на крајот се разотиде откако искрснаа расправии меѓу нив.
Малолетници беа дел од вандалските протести и во петокот и во саботата, и помеѓу Македонците и помеѓу Албанците, иако ова беа најмладите учесници досега. Хелсиншкиот комитет повика да не се злоупотребуваат децата на ваков брутален начин во политички агенди и разгорувања на етнички тензии. Кој навистина ги организираше сите протести во овие седум дена се уште е непознаница. Единствено ќе останат запаметени лицата на младите во крвнички пресметки со другите млади од различни етнички заедници.
За утре на социјалните мрежи е најавен повик за протест на младите Македонци пред владата.
Во видеото можете да ги погледнете интегрално изјавите на постарите верници кои се обидуваа да ги одвратат децата од намерата да излезат на улица.