Фала му на Господа живи здрави сме, мерцедесот изгоре буквално за три минути, додека се движевме на патот кај селото Мирковци, одеднаш експлодира моторот и се запали возилото, сведочи Ѓорѓи Манасков, претседателот на Стопанската комора за енергетика за Нова ТВ по несреќата на автопатот кај обиколницата Визбегово кон Скопје север.
Тој вели дека полицијата која за среќа, во моментот на експлозијата се нашла во близина на местото, како и екипата од противпожарната бригада експресно реагирале, но мерцедесот С200, кој е приватна сопственост на претседателот на комората целосно изгорел.
– Полицијата и противпожарната екипа дојдоа навистина за многу брзо време. Кога експлодираше моторот на мерцедесот веднаш излеговме надвор, еден од полицајците кои дојдоа на местото ми рече „бегај подалеку“, се се одвиваше со голема брзина, возилото изгоре, вели Манасков за Нова ТВ.
Тој во автомобилот бил со сопатник и како што вели, не се повредени и добро се чувствуваат.
МВР потврди дека на 21.12.2021 во 21.14 часот во СВР Скопје било пријавено дека на обиколница, во близина на клучката „Мирковци“, настанал пожар во патничко возило во движење „мерцедес“, со скопски регистарски ознаки, сопственост на Ѓ.М.(48) од Скопје.
С.М.
