Што барале Никола Поповски, Елизабета Канчевска Милевска и Бранислав Светозаревиќ во просториите на град Скопје во комисијата за интервјуа на кандидати за директор на Музејот на град Скопје, праша денеска пред медиумите координаторот на Советничката група на СДСМ и коалициските партнери во Советот на Град Скопје, Дамјан Манчевски.
– Што барале овие владини функционери да водат интервјуа во Град Скопје? Музејот на Град Скопје нема никакви допирни точки со дипломатијата. Музејот е институција под целосна ингеренција на локалната власт, така што во оваа прилика спорно е и присуството на министерката за култура и на директорот на Музејот на ВМРО, изјави Манчевски.
Според него, се работи за класичен пример на поклопување на државата од страна на владејачката партија.
– ВМРО-ДПМНЕ си воделе партиски интервјуа, во просториите на Советот на Скопје. Нивната дрскост оди до таму што министри од Владата решаваат за се и сешто, што не е нивна работа. Очигледно професионалноста и искуството не се главен критериум при изборот на кандидатите, туку партиската лојалност. Нема никаква поделба помеѓу централната и локалната власт. Се е Никола Груевски, дополни Манчевски.
Манчевски потенцираше дека додека премиерот Груевски бил дел од Владата, немало никакви шанси за одвојување на владејачката партија од државата.
– Човекот кој е креаторот на проблемите нотирани во извештајот на ЕУ, не може да биде дел од решението. Овој случај е уште една потврда дека Никола Груевски треба да поднесе оставка. За своето соучесништво во овој скандал кој јавно го призна на минатата седница, одговорност треба да поднесе и Коце Трајановски, додаде тој.