Во пресрет на судењето на претседавачот со општина Центар, Мирослав Шиповиќ и уште 10 лица, членови на управниото одбор во АД „Машинопромет“, кои се товарат за злоупотреба на службената положба и финансиски криминал тежок милион евра, СДСМ заедно со градоначалникот на Центар Андреј Жерновски и советниците од редовите на СДСМ изразија поддршка пред Основниот суд 1 Скопје.
– Ние сме цврсто убедени во неговата невиност и знаеме дека тоа ќе се докаже во текот на судскиот процес, изјави Дамјан Манчевски, потпретседателот на СДСМ пред новинарите.
Тој изрази надеж дека судот ќе постапи и ќе одлучи согласно законите и доказите а не по политички диктат од власта.
– Целиот случај против Шиповиќ и соработниците е уште еден дел од систематското газење на јавно изразената волја на граѓаните на Центар на локалните избори, кои му кажаа гласно НЕ на ВМРО-ДПМНЕ и проектот Скопје 2014.
Според Манчевски, владејачката партија и понатаму не може да се помири со тешкиот пораз во Центар, а бесот го истура врз недолжни граѓани, и рече дека ваквото однесување ќе им донесе пораз на следните избори.
Тој пред камерата на НОВА, потенцираше дека Шиповиќ и понатаму останува политички затвореник на сметка на објектите поврзани со градежно земјиште и проектот Скопје 2014.