Создадената политичка криза ги загрозува виталните интереси на македонското оштество и бараме нејзино итно разрешување преку воспоставување квалитетен дијалог меѓу политичките субјекти одговорни за состојбата во земјата, смета претседателството на Македонската академија на науките и уметностите.
– МАНУ изразува крајна загриженост поради создадената состојба на политичка криза, која ги загрозува виталните интереси на македонското општество и објективно го попречува напредокот на неговота евро-атланска интеграција. Смета дека постоењето демократски и толерантен дијалог врз начелата на владеење на правото е највисок државен интерес што сите учесници во политичките процеси и одлучување се должни да го почитуваат, се вели во соопштението од МАНУ издадено по денешната седница на Претседателството на Академијата.
Заради општото добро потребен е неодложен излез од постојната политичка ситуација во земјата и брзо воспоставување на дијалог помеѓу политичките субјекти одговорни за состојбите во земјата, се додава во соопштението.
– Само низ толерантен дијалог, издигнувајќи се над сопствените партиски позиции, може да се постигне договор за надминување и на најсложените внатрешни проблеми и да се унапредува демократската основа и функционалноста на институциите, како и одговорноста за управувањето со општествените работи, се истакнува во соопштението од Македонскара академија на науките и уметностите.