„Она што сега треба да се фокусираме е спроведување на реформската агенда, брзо напредување во процесот и граѓаните да почнат да ги чувствуваат придобивките од преговорите со ЕУ. Од тука и мојата заложба и барање секој еден да биде вклучен во преговорите, што се национална задача за сите нас. Јавно да се дискутира, заеднички да се делува, за сите предности и слабости забележани во Извештајот побрзо се надминат“, изјави во обраќањето вицепремиерот за европски прашања Бојан Маричиќ на денешната панел дискусија за Кластерите 2 и 3 „Внатрешен пазар“ и „Конкурентност и инклузивен раст“ во рамки на серијалот „На европскиот пат: Нови реформи, нови можности“.
Маричиќ истакна дека годишниот Извештај на Европската комисија за 2022 година, ќе биде основа за компарација како било пред, а како после почетокот на преговорите, додавајќи дека скринингот со ЕУ се одвива непречено според предвидената динамика, оценувајќи дека ќе донесе поголем поттик за реформи во земјата.
„Затоа, пред Извештајот застануваме транспарентно, инклузивно и одговорно кон сè она што е нотирано во него. Секоја забелешка и препорака да биде наша насока за планирање на следна реформска активност, доколку сакаме да успееме во овој државнички проект, кој се случува само еднаш и за кој имаме само една шанса. Досегашните воспоставени реформи и стандарди се одржливи и продолжуваат во сите области, а почетокот на преговарачкиот процес е нова можност, реформите продолжуваат уште позасилено“, нагласи Маричиќ.
Како што оцени тој, напредокот ќе зависи само од нас, оценувајќи дека „немаме повеќе блокади од никого, затоа нема простор за изговори и силна поддршка од европските институции, од државите членки, што треба да нè поттикне да го интензивираме спроведувањето на европската реформска агенда“.
Во однос на денешната дискусија за Кластер 2, „Внатрешен пазар“ и Кластер 3, „Конкурентност и инклузивен раст“, рече дека поглавјата од овие кластери имаат директно влијание врз животот на граѓаните бидејќи опфаќаат значајни области и за работниците и за работодавачите, малите и големите претпријатија, индустријата, стопанството, економската и монетарната политика, оданочувањето, социјалната политика, но и науката и истражувањето и образованието и културата.
„Свесни сме и знаеме дека пред нас е сложен и долгорочен процес што бара континуитет и силна политичка волја за темелни реформи. Но, пред нас има јасно поставена цел, јасен план за реформирање кој мора да продолжи. Ова не е проект на Владата, ова е државен и тимски проект кој надминува и мандат на една влада и партиски интереси. Знаеме дека обврската што ја преземаме е тешка, но ја знаеме и која ни е целта: развој, просперитет, европска економија, европски пазари, европски животен стандард за граѓаните, до крајот на 2030. Амбициозна, но достижна цел“, заклучи Маричиќ во своето обраќање.