И како сега кога ќе одите во театар, ќе му верувате на Хамлет? На прашањето да се биде или не, нашите уметници решија – да не се биде, учесвувајќи во фарсата наречена „Уметнички протест против неизгласувањето на буџетот“, во режија на власта. Решија да се подметнат во политичко – партиските битки.
А, цело време се прашувавме каде се, па ги прашувавме нив зошто како уметници не го дигнат гласот против неправдите на нашето општество, против материјалното и духовно осиромашување во Македонија, против невработеноста, немоѓноста да се отиде на лекар и да се купат лекови, против недостоинствениот живот на огромен број македонски граѓани.
Одговорот ни го испорачаа еден петок- тие сакаат скапи згради и сигурни платички и да се во милост на власта. Како во филмот „Мефисто“ на Иштван Сабо, одличен филм за духовната беда на режимските уметници кои му се продаваат на системот. А тие што маршираа му се продадоа – за плата, за фотелја, за хонорар плус, ги погазија идеалите на илијадниците уметници во светот и во историјата што страдале затоа што не сакале да играат како што свири власта. Велеа дека за уметност и за достоинство им биле потребни новите згради што изедоа милиони евра, велеа не сакале да се срамат од своите плати…и ја утнаа поентата, а за тоа аргумент е долгата листа уметници низ светската историја кои жртвувале се’: животот, слободата, благосостојбата, само за да останат на страната на правдата.
А нашата театарска примадона Јелена Жугиќ, налутено ни соопшти дека и во Франција, кога владеела најголемата беда, се граделе палати и мусеи, но Јелена заборави дека на Марија Антоанета, која му препорача на сиромашниот народ да јаде колачи ако нема леб, тој ист народ – ја скрати за глава.
Дел од уметниците вработени во државните институции, со уметнички манифест соопштија дека ако не се донесе буџетот до 31 декември, биле спремни на колена да клекнат и да плачат пред седиштето на СДСМ. Комедијата стана трагедија. Затоа што клекнувањето на колена не е секогаш најдобриот начин, некогаш треба да се остане исправен и покрај неволјите што тоа ќе ви ги донесе.
Декември, 2012