Со протестен марш пред Владата и Собранието, синдикалните организации и левичарските движења денеска го одбележуваат Меѓународниот ден на трудот, 1-ви Мај.
Протестот започна во 12 часот пред Собранието, од каде продолжи пред Владата на РМ. Протест има и во Куманово.
.jpg)
Граѓанските движења имаат и конкретни барања до новата Влада.
Левичарското движење Солидарност има три барања: Законот за минимална плата да не ги дискриминира работниците кои се најзгрозени и да се изедначи на сумата од 8.800 денари, да се остварува правото на штрајк и да се овозможи вистинско функционирање на синдикатите.
-Едно од барањата е веднаш да има казни за работодавците кои не го почитуваат Законот за минимална плата, а не како што е предвидено, прво да се едуцираат, па кога повторно ќе направат прекршок да се казнуваат, изјави за НОВА, Здравко Савевски од Солидарност.
Во Соопштението на ЦИВИЛ по повод Денот на трудот, стои:
1-ви Мај е ден на сите работници во светот. Тоа е ден на борбата за правда, достоинство и чесност, за достојни услови за работа и пристојна плата за сите.
1 Мај е ТВОЈ ДЕН.
Ден кога ќе се освестиш и ќе го земеш тоа што ти припаѓа тебе и на твоите сограѓани. 1 Мај е ден кога треба да сфатиш дека работата не е привилегија, туку ТВОЕ ПРАВО..
Навремена и фер исплата за твојот труд и грижа за тебе кога си без работа или си болен, социјална и здравствена заштита за тебе и твоето семејство, пензија кога си стар – тоа не се услуги од државата или од газдите – тоа се ТВОИ ЗАРАБОТЕНИ И ЗАСЛУЖЕНИ ПРИДОБИВКИ.
Отвори ги очите!
СОЛИДАРНОСТ СЕГА!
Додека граѓанскиот сектор и Синдикалните организации ќе го одбележат Меѓународниот ден на трудот со протест, на плоштад ќе излезат и ССМ, но најавија дека нема да се приклучат на протестот.
-Нема да се придружиме никому. Ќе се собереме да ги промиовираме измените на Законот за безбедност и здравје при работа во делот на информирањето, потврдија за НОВА, Анѓелко Анѓелковски секретар на ССМ.
