Загадениот воздух и натаму проблем за граѓаните. Последниве денови дел од градовите низ Македонија повторно се најдоа на врвот од светските листи по загаденост. Екологот Африм Османи вели дека дури за два пати е поголем бројот на починати лица по добиени болести од загаден воздух, отколку од коронавирус.
Решението го гледа во воведување на карантини во градовите каде во континуитет има зголемен број на ПМ10 честички во воздухот.
„Која е логиката за 1600 починати да се воведе карантин, вонредна состојба, а да се занемарува тоа што 3 илјади лица годишно умираат од аерозагадување. Во целина ова го земаме несериозно.“, вели професорот Африм Османи.
Професорот Османи вели дека полицијата како што казнува за неносење маски исто треба да казнува и за загадување на воздухот.
„Анти-ковид мерките се носење маска како што е случајот со носење маска поради аеро-загадувањето. Потоа е сообраќајот кој е еден од главните фактори за загадување, треба да има рестрикции во сообраќајот и на крајот зошто да не и карантин на населението воопшто.“, рече Османи.
Скопје, Тетово, Куманово и Кавадарци се меѓу најзагадените градови во светот. Доколку ПМ10 честичките два дена едноподруго го надминуваат прагот над 175 ПМ10 тогаш владата излегува со препораки.
Мерки кои се преземаат доколку се надмине прагот на загаденост:
Да се ослободат од работа бремените жени, лицата над 60 години како и лицата со хронична астма
Да не се организираат спортски натпревари и други културни манифестации на отворено
Вршење чести контроли на филтрите
Греењето во објектите и домовите, индустријата и постарите автомобили се главните причини за загаденост во воздухот, вели министерот за животна средина и просторно планирање Насер Нуредини. Тој додава дека загадувањето драстично се зголемува помеѓу 16 и 17 часот попладне, и навечер во периодот околу 22, 23 и 24 часот.
„Причината за ова е што граѓаните се враќаат дома и го вклучуваат греењето, но тоа не се само домовите на луѓето, туку и други објекти во државата, а потоа имаме и воздушен притисок. Значи, една од причините, за жал, е греењето во нашите објекти и домови. Друга причина дефинитивно е индустријата што треба да се контролира, и можеби треба да има поригорозни контроли во иднина“, посочи Нуредини.
Според истражувањата греењето е една од причините за загаден воздух, а Град Скопје неколку пати по ред даваше субвенции за инвертори но тоа не е доволно за намалување на загаденоста. Најголемиот дел граѓани се греат на дрва.
Од друга страна возилата се втора причина за загадениот воздух но сè уште не се во функција еколошките налепници во црвена, жолта и зелена боја за класифицирање на возилата според скалата на емитување гасови.