Во Македонија има масовен одлив медицински сестри од јавното здравство во странство и во приватните болници. Лошите услови за работа, ниските плати, работата за мизерни хонорари, неусогласувањето на платите на оние со високо образование, создаваат незадоволство и голем број медицински сестри се повеќе го напуштаат јавното здравство.
Работа за нив има во земјите од Западна Европа, во Германија, Австрија , Швајцарија, Норвешка но и во Обединетите Арапски Емирати. Според огласите во големите болници, може да се види дека се бараат медицински сестри на сите оддели, од анестезија, до кардиологија и одделенијата за новороденчиња, но и се бараат и главни сестри и менаџери на одделенија. НОВА истражуваше како се движат платите на медицинските сестри во некои држави . Месечните примања во овие земји се неколку пати поголеми од оние во македонските болници.
На пример, во Швајцарија почетна плата на дипломирана медицинска сестра е 3000 евра, во Германија нешто помалку од 2000 евра, но се разбира треба да се знае јазикот и да се положи испит со кој се признава дипломата. Во Словенија, почетна плата на медицинска сестра со средно образование е 600 евра, но со дежурствата и прекувремена работа достигнува 900 евра, на тие со факултетска диплома платата е двојно поголема. Во САД пак, во зависност од државата, но и квалифакациите на сестрата платите се движат од 40 000 до 100 000 долари на годишно ниво. Иако е евидентен интересот за одење странство и одливот на овој кадар, нема официјални податоци колку медицински сестри досега заминале од државата.
Масовен одлив на медицински сестри во приватниот сектор се случи пред неколку години со отварањето на приватните болници. Се уште, работата таму за многу од нив е поголем предизвик од таа во државните болници.
-Медицинските сестри се одлучуваат за приватното здравство од повеќе причини. Има група на медицински сестри кои долго време работат без надомест и немаат решен статус во јавното здравство, затоа се одлучуваат да преминат во приватното. Од друга страна има сестри со искуство, кои во приватното гледаат можност за напредок во кариерата, подобри услови, поинаков пристап во лекувањето на пациентите, континуирана едукација, изјави за НОВА Ирена Нечовска претседателка на Здружението на медицински сестри, акушерки и техничари „Славјанка Влахчева“.
Но, она што загрижува е состојбата на скопските клиники каде голем број на медицински сестри со години работат по договор на дело, не пријавени, повеќето од нив само за 4 500 денари. Некои од нив така работат по пет- шест години.
-Ние сме столбот на работата на многу клиники, дежураме за време на празници и викенди, бидејќи нема доволно кадар. Одговорноста е голема, даваме терапија, ставаме инфузии, некои работат и во операциони сали. Иако, со години ни се ветува работа ситуацијата е непроменета. Нови вработени се примаат од надвор, најчесто по партиска линија затоа и некои сестри почнаа да си заминуваат, како што беше случајот со медицинските сестри од Клиниката за гинекологија, изјави за НОВА, медицинска сестра која сакаше да остане анонимна.
Нема податоци колку медицински сестри има во јавното здравство, а колку во приватното, колку се невработени, ниту колкав е одливот на овој медицински кадар. Такви податоци не постојат во Лекарската комора бидејќи тие се грижат само за лекарите, а во Министерството за здравство на одговор не упатија во Здружението на медицински сестри од јавното здравство, кое постои со години. Но, во ова Здружение немаше интерес да одговорат на нашите прашања.
Медицинските сестри бараат Закон со кој точно ќе се дефинира улогата на медицинската сестра во државата, нејзините обврски и одговорности. Токму еден од приоритетите на Здружението „Славјанка Влахчева“, е Закон по теркот на земјите од Европската Унија.
– Во Македонија нема Закон со кој точно е дефинирана улогата на медицински сестри. Во Законот нашата професија, и ние како медицински сестри сме спомнати само во една реченица. Секаде во светот во развиените земји постои закон за медицински сестри, па дури и во поблиските како на пример во Словенија и Хрватска, во кој е точно дефинирана улогата медицинската сестра и се потенцирани нејзините одговорности и активности. Затоа сакаме Законот за сестрите да се дефинира по теркот на земјите кои се дел од Европската унија и тоа ќе биде една од нашите приоритетни активности, вели Нечовска.
Токму ова Здружение кое го носи името на првата школувана медицинска сестра во Македонија, Славјанка Влахчева, било создадено за да можат да ги реализираат овие цели. Во него членуваат медицински сестри од приватните болници, на кои се повеќе им се приклучуваат и сестри од јавното здравство.
.jpg)