После вчерашниот состанок на Советот на СОНК и донесените одлуки за понатамошно делување, раководствата на регионалните одбори го продолжија штрајкот со глад.
„Враќање назад нема. Продолжуваме со штрајкот и убедени сме дека во текот на следните денови ќе дојде до исполнување на нашите барања, односно ќе биде постапено по Решението на Државниот просветен инспекторат“, вели претседателот на регионалниот одбор на СОНК од Прилеп, Ванчо Спиркоски.
Најголемиот дел од граѓаните на Прилеп со кои денес разговаравме на оваа тема, го оправдуваат ставот на СОНК и им даваат поддршка на тројцата професори од универзитетот во Штип.
„Жалам што живееме во држава во која граѓаните мораат да прибегнат кон вакви крајни мерки, каква што е штрајкот со глад. Што е следно? Зарем треба да се случи нешто пострашно, убиство или самозапалување, за да биде слушнат нивниот глас и да го добијат она што по устав и закон им припаѓа? Го поддржувам штрајкот и уште повеќе жалам што интелектуалците остануваат неми и без било каков став по вакви прашања“, вели една од анкетираните.
„Им честитам на професорите на покажаната храброст и решителност да се изборат за своите права, тоа е она што нам како на народ ни недостига. Во секој случај, прв пат после подолго време се почувствува некаква раздвиженост кај синдикалците. Знаејќи ги методите на работа на актуелната власт, не сум сигурен дали локалните раководства на синдикатот ќе издржат до крај. Меѓутоа ова им е шанса да покажат солидарност и единство, бидејќи само на тој начин ќе ја остварат целта“, убеден е еден од повозрасните прилепчани.
Штрајкот со глад го продолжија и претседателот и секретарот на регионалниот одбор на СОНК од Битола. Според зборовите на Фанче Јошевска, претседател на битолскиот регионален одбор, веќе се направени првите контакти со претседателите на синдикални организации, во насока на припрема за најавениот протест на СОНК пред Министерството за образование и наука во Скопје.
Покрај поддршката од професорите во битолските основни и средни училишта, се огласија и професори од Високата медицинска школа во Битола, како и деканот на правниот факултет во Кичево, кој функционира во состав на универзитетот „Св.Климент Охридски“ од Битола, проф. д-р Илија Тодоровски. Со отворено писмо, тој го повика ректорот на штипскиот универзитет, д-р Саша Митрев, да реагира согласно Законот за високо образование.
„Случајот со тројцата професори од штипскиот универзитет претставува опасен преседан, затоа што не е досегашна карактеристика на ниедна високообразовна и научна институција во Република Македонија масовно да се отпуштаат наставници кои во целост ги исполнуваат условите за избор во повисоко звање, во случајов вонреден професор“, напиша во своето писмо проф. д-р Тодоровски.