Државните ресурси и функционерите се ставени директно во служба на изборната кампања, што е спротивно на законите. Ќе има ли Македонија фер избори?Министри држат прес конференции од партиските штабови, група министри дури и го промовираат изборните програми на кандидатите за градоначалници од штабовите.
Секојдневно гледаме како премиерот и високите функционери ги придружуваат кандидатите за локалните избори насекаде. Се отвараат објекти, довршени и недовршени, се удираат камен – темелници, се фрлаат лопати, се вработува, се зголемуваат плати и пензии и така натаму.
Граѓанската асоцијација МОСТ прва предупреди за злоупотребите на јавните ресурси во кампања.
“Забележано е користење на општински возила, забележано е користење на возила од различни министерства, забележано е користење на ресурси од јавни претпријатија и така натаму и така натаму”, соопшти Дарко Алексов од “Мост”.
Во извештајот на ОБСЕ за минатите избори главната забелешка од која произлегоа и клучните препораки беше злоупотреба на државните ресурси во партиски цели. За поранешниот антикорупционер Драган Малиновски, и на овие избори ништо не се променило. Спорни се и проектите и вработувањата, но и директното инволвирање на министрите и премиерот во кампањата.
“Тоа повторно е инволвирање на Владата, на ресурисите на Владата во промоција на локалните кандидати. Ти имаш право да си ја водиш политиката на министерството, сето тоа е во ред, меѓутоа не можеш во изборна кампања или на промотивен настап на градоначалникот да се јавуваш.
Очигледно е дека тоа е злоупотреба, тоа е најексплицитно искажано во членот 11 од законот за спречување на корупцијата. Таканаречена политичка корупција се вика тоа, коа им се ветуваат работи на граѓаните. Сите тие новокреирани проекти кои сега се промовираат, од субвенции, самовработувања и така натаму, сите тие се забранети”, вели Драган Малиновски, поранешен член на Антикорупциската комисија.
Оние повиканите да реагираат, Антикорупциската комисија, повторно ги нема. А во услови кога без надзор се трошат државните ресурси за кампањи, ќе има ли Македонија фер изборна кампања?
“Ние можеме да речеме дека ќе организираме демократски избори, тоа е процедура, демократијата е процедура, фер не можеме затоа што фер е политичка култура. И ние не го ни знаеме зборот фер. Сите овие работи, злоупотребите кои ги споменувате, секако дека не се фер. Но, ние единствено можеме да се надеваме дека ќе имаме демократски избори, но не и фер, тоа е состојба на умот”, вели универзитетскиот професор Денко Малески.
Во меѓувреме кампањата продолжува и секој ден се засилува со по некое ново ветување, нов проект, ново вработување. А од ОБСЕ најавија дека токму на овој сегмент ќе посветат специјално внимание.