Организацијата на ОН за образование, наука и култура (УНЕСКО) во најновиот нацрт извештај препорачува да го стави Природното и културното наследство на Охридскиот регион на Листата на загрозено светско наследство, поради недоволниот напредок до решавањето на проблемите и поради постојаните закани и големите инфраструктурни и развојни проекти, кои што претставуваат потенцијална опасност.
УНЕСКО со жалење констатира дека малку е направено за имплементација приоритетните препораки на мисијата на УНЕСКО од 2017 година, како и тоа дека државата не го информира редовно Комитетот за светско наследство за проектите и активностите што се предвидуваат и се реализираат во заштитеното подрачје. УНЕСКО истакнува дека со голема загриженост ја следат најавата за продолжување на оригиналната траса на железничкиот Коридор 8, и покрај барањето на Комитетот за алтернативно решение надвор од заштитените подрачја. Исто така, УНЕСКО е загрижен за делот од автопатот од Требеништа до Струга и бара од државата итно да пронајде друго решение за проектот.
Тие го поздравуваат запирањето на патот преку Галичица и изградбата на ски центар на планината, како и запирањето на експресниот пат Охрид – Пештани.
-Мисијата на УНЕСКО при инспекцијата во 2017 година забележа бројни закани за природните и културните вредности, како: намалено ниво на вода, неконтролирано испуштање, загадување на водата поради несоодветни системи за третман на отпадните води, неконтролиран урбанистички развој и несоодветни експлоатација на крајбрежните зони. Ова резултираше со зголемено загадување и негативно влијание врз природното богатство. Мисијата заклучува дека препораките не се имплементирани за овие две години и регионот на Охрид треба да се стави на листата на загрозено светско наследство, се наведува во нацрт извештајот.
Ексшертите на УНЕСКО бараат од државата во консултации со Центарот за светско наследство да спроведат мерки со кои сегашната ситуација ќе се коригира, со што регионот на Охрид би се тргнал од оваа Листа.
Во нацрт заклучоците УНЕСКО забележуваа дека не се имплементирани ургентните препораки на Комитетот, посебно во делот на воведување мораториум на легализација на дивоградбите, попис и уривање на оние кои негативно влијаат врз подрачјето. Се бара со закон да се заштити каква било понатамошна нелегална изградба во заштитеното подрачје.
За тоа што од препораките ќе биде имплентирано, државата до 1 февруари 2020 треба да достави до Комитетот за светско наследство, извештај за тоа што е направено.
Нацрт заклочоците се очекува да бидат усвоени на конференцијата на Комитетот за светско наследство од 30 јуни до 10 јули во Баку.