Откако изборите во редовниот рок во октомври пропаднаа поради неисполнување на цензусот, општините Маврово – Ростуше и Центар Жупа и натаму остануваат без градоначалник.
Вонредните избори за градоначалник во двете општини требаше да се одржат на 17 април, меѓутоа рокот за кандидирање истекува а освен кандидатот од СДСМ, опозициската коалиција не поднесе кандидатура.
„За жал ВМРО-ДПМНЕ не собра храброст да излезе пред граѓаните на Маврово и Ростуше на повторените локални избори кои треба да се одржат на 17 април“, вели Медат Куртовски, кандидат на СДСМ за Маврово-Ростуше.
Кандидатот на владејачката партија притоа ја обвини опозицијата за неодговорност кон општината и дека „не им е важно општината да биде функционална со целосен капацитет и легитимитет“.
Куртовски вели дека собрал потписи од коалициските партнери за неговата кандидатура, но дека поради немање кандидат од опозицијата постои можност изборите пак да не успеат односно да не биде исполнет цензусот, и затоа ја повлекува кандидатурата.
Дотогаш со општината ќе управува владин повереник, но со ограничени надлежности.