Говорот на омраза, стигматизација или игнорирањето се вообичаени тактики кога медиумите известуваат за маргинализираните заедници, посочуваат од Коалицијата за сексуални и здравстени права на маргинализираните заедници. Затоа денеска беше промовиран Водич за медиуми, публикација која го разгледува прашањето за почитувањето на новинарските стандарди при известувањето за различностите и за дискриминацијата.
Според Тамара Чаусидис, претседател на Самостојниот синдикат на новинари, маргинализираните групи или се игнорираат или пак за нив се известува низ призмата на предрасудите, што дополнително го зголемува проблемот.
Од друга страна, наместо подобрување, Роберто Беличанец од Центарот за развој на медиуми, посочува дека последниве години се нотира влошување на состојбите со медиумското известување на маргинализираните заедници. Според него, се промовираа конзервативно општество, но со двојни аршини. Новинарите си дозволуваат да коментираат за работи кои не ги познаваат, вели тој, а говорот на омраза, стереотипите и предрасудите се вообичаен дел од новинарските текстови.
Медиумите ги криминализираат сексуалните работнички, при известување за лицата носители на ХИВ вирусот се користат предрасуди, додека сензационализмот е редовно присутен кога медиумите ги актуелизираат состојбите во ЛГБТ заедницата, вели активистот Жарко Трајановски.
Со него се согласува и Кочо Андоновски, активист за правата на ЛГБТ заедницата во земјава. Според него, македонското општество се плаши од маргинализираните заедници, а тоа им помага на одредени државни структури да останат на власт.
Почитувањето на човечкото достоинство, осуда на говорот на омраза и на дискриминацијата, се императив на новинарството. Сепак, кога станува збор за маргинализираните заедници, овие принципи редовно се прекршуваат, е општиот заклучок од новиот Водич за медиуми.
Ј.Ј.