Во судирот помеѓу Грузија и Јужна Осетија во 2008 година, Русија не се бореше против режимот во Тбилиси, вели рускиот премиер Дмитриј Медведев во пресрет на петгодишнината од случувањата.
Целта на судирот не беше промена на власта ниту пак егзекуција на тогашниот претседател на Грузија, Михаил Сакашвили, надополнува Медведев.
„Ние не се боревме против Грузија, туку ги штитевме интересите на Руската Федерација“, изјави рускиот премиер во интервју за руската телевизија „Раша тудеј“.
Медведев, кој во 2008 година беше претседател на Руската Федерација, рече дека никогаш не бил заинтересиран за личната судбина на Сакашвили и сметал дека за неговата судбина треба да решаваат граѓаните на Грузија.
За него, тој конфликт никогаш не претставувал војна помеѓу Грузија и Русија.
„Тоа беше конфликт помеѓу Грузија и Јужна Осетија, во кој моравме да интервенираме како би ја приморале Грузија да престане да ги истребува луѓето кои ги сметаа за свои државјани, и кои истовремено беа граѓани на Русија“, објаснува премиерот на Русија.
Медведев се надева дека тажната историја од руско-грузијските односи е веќе завршена.
„Сигурен сум дека се ќе биде во ред, нашите народи никогаш не биле во кавга“, заклучува тој.