Амбасадорите на САД и ЕУ, Аиво Орав и Џес Бејли, на попладневната средба со техничкиот премиер Емил Димитриев порачаа дека остануваат уште многу важи работи да се решат од Договорот од Пржино, а фокусот е ставен на медиумите и изборите.
Пред распуштање на Собранието, но не подоцна од 20 февруари ЕУ и САД заедно ќе го оценат спроведувањето на обврските од Пржино, како и тоа дали се исполнети условите за веродостојни избори на 24 април.
Исто така, тие порачаа ДИК да биде целосно обезбедена со персонал и финансии. Што се однесува до Избирачкиот список, побараа до 19 февруари да бидат завршени првичните вркстени проверки на сите релевантни бази на податоци, вклучително и теренските проверки.
– Мора да постои јасна законска рамка за навремено отстранување на имиња кои не припаѓаат во избирачкиот список, рекоа тие во заедничката изјава.
– Сите лидери на политичките партии да се воздржат од напаѓање на јавни фунцкионери чија цел е да работат за да се обезбедат кредибилни и веродостојни избори на 24 април, додаде Бејли.
Амбасадорите, исто така, рекоа и дека 19 февруари е рокот кога мора да се постигне договор за медиумските реформи, а телевизиите да демонстрираат „објективно и непристрасно прикажување на настаните со еднаков третман на различните гледишта и мислења“.
Претставниците на САД и ЕУ пред Димитриев појаснија дека високите функционери мора да дадат јасни и писмени инструкции дека нема да се толерира никаков притисок врз вработените во јавната администрација и дека ниту еден граѓанин нема да се плаши за своето вработување или примање на социјални бенефиции без разлика која партија или кандидат поддржуваат.
Ваквите инструкции Бејли и Орав ги испратиле и до сите четворица лидери на партии.