Затворање на границите за Русија кон Европа односно замрзнување на банкарските сметки на руската елита, се дел од механизмите кои и стојат на располагање на ЕУ со цел да ја спречи Русија од воена интервнеција во украинската област Крим.
– Неколку илјади забрани за патување, и неколку десетици замрзнати сметки можат да направат голема разлика. Ако милиони урбани Руси сфатат дека упаѓањето во Украина значи и крај за летниот одмор, би можеле да подразмислат…ако богатите Руси сфатат дека нивните сметки може да бидат замрзнати, како што се случи со украинските олигарси, тоа би можело да влијае на нивните размислувања, се вели во анализата на американскиот магазин „Нова Република“.
>> Русија со ултиматум: Повлечете се или соочете се со „воена бура“
Според написот, голема улога играат и туризмот како сигурносен вентил за голем број од руската средна класа која „се држи“ до европската култура, како и школувањето на децата на руската елита во приватните училишта ширум ЕУ или Швајцарија. Неизоставен дел се и парите од сите калкулации.
-Бидејќи нема Русин кој сериозно верува во рускиот финансиски систем, богатите Руси го складираат своето богатство во европските банки. Со други зборови, рускиот општествен поредок зависи од Европа, која руската пропаганда ја исмејува, стои во анализата.
Важно е да се забележи, Русија има поголем бенефит од Европската унија, бидејќи таа важи за нејзин најголем трговски партнер. Во обратна ситуација не важи истото. ЕУ се потпира на Русија за природен гас и нафта, но во замена праќа готов производ. И доколку се влошат односите, Унијата сепак има можност за развивање фузија и други алтернативи со кои би се ослободила од вештачката зависност.
Во меѓувреме, и покрај кршењето на обврските од меѓународните договори, според известувањата на светските медиуми, земјата на Владимир Путин поставила ултиматум кон Украина за повлекување на своите сили од Крим, бидејќи во спротивно Русија е подготвена да интервенира. Наводи кои беа директно отфрлени од Москва како „бесмислени“.
>> Русија го демантира ултиматумот, ОБСЕ вечерва праќа набљудувачи во Украина
Според последните информации, Полска е земјата која повикала на итен состанок на НАТО, бидејќи според неа, кризата во Украина претставува закана за националата безбедност.
Кримската криза започна со заземањето на двата најголеми аеродрома, главниот аеродром Симферопол, и воениот во Севастопол од страна на федералната морнарица на Русија, а тензијата настана по потпишувањето на договорот за прекин на тримесечните крвави судири помеѓу претседателот Виктор Јанукович кој сеуште себе си се смета за легитимен претставник на народот, и опозициските лидери.