– Секое поттикнување на еден етникум врз друг, претставува говор на омраза, а не непрофесионално работење, вели во својата реакција за НОВА, Замир Мехмети, членот на Агенцијата за аудио и аудиовизуелни услуги, откако на денешната седница со осум гласа „за“ и седум воздржани се изгласа извештајот на стручните служби во кој се заклучува дека нема елементи на говор на омраза во обраќањето на уредникот на Сител, Драган Павловиќ Латас.
Замир Мехмети уште надополни дека не се согласува со анализата, и потенцираше дека таа не била коректно изготвена, не навлегувајќи во шпекулации за тоа.
И покрај тоа што седницата се одвиваше во жестока атмосфера, аргументите на членовите кои го бранеа ставот дека новинарот Латас не ширел говор на омраза Мехмети ги нарече смешни, и дека на крај сепак уредникот на Сител телевизија испаднал победник.
На седницата на која денеска се разгледуваше извештајот на стручните служби, дел од челновите реагираа дека се постапува селективно што е и неправилно, а истото го надополнија со одлуката на ова тело да ја опомени АлсатМ за сензационалистичко известување.
„Гледам поттикнување на еден етникум врз друг. Овој човек со години продолжува на овој начин, известува како сака само не објективно и професионално. Крајно време е да не ја префрламе топката нигде, туку да направиме едно соопштение и да го осудиме начинот на информирање. За мене лично ова е фашистичко известување што го прави Латас и не еднаш тоа е постојано. Мора да му покажеме дека со ова не може и не смее да продолжи“, рече денеска на седницата Замир Мехмети.
Воедно, во почетокот на месец февруари на обраќањето на Драган Павловиќ-Латас реагираше и уредникот на АлсатМ, Мухамед Зекири кој на својот Фејсбук профил напиша:
„МВР ќе поднесе ли преставка сега до СРД или по ново Агенцијата за електронски медиуми за Сител односно Латас кој тресе што му текне … или пак за МВР тоа се повици за соживот, меѓусебна толеранција, зголемување на етничка (не) трпеливост… да не збориме за навреди кон неговите неистомисленици. Ако не на МВР, ќе му текне ли на Зоран Трајчевски да свика посебна седница како што свика за Алсат-М под притисок на Јанкулоска и да заземе став по ова прашање? …“, напиша тој на неговиот профил.