На лидерот на ДУИ, Али Ахмети, и на интегративците ќе им требаат милионски суми во евра за во целост да го реализираат проектот „Меморијален центар во Зајас“ доколку дел од трошоците не ги покрие Општината Kичево или Владата, објавува денешен „Дневник“.
Иако се уште нема одлука, од ДУИ велат дека, сепак, најголемиот товар за трошоците ќе го обезбедат преку донации од дијаспората.
Многу прашања и дилеми се отвораат по почетокот на изградбата на меморијалниот центар и по најавата на Ахмети дека ќе се изврши ексхумација на најмалку 500 убиени Албанци во балканските војни од српската војска. Намерата е да се утврдат точните локации на околу девет масовни гробници, тие да се отворат и убиените да бидат идентификувани и закопани во одделни гробови во меморијалниот центар.
Засега е јасно само дека доколку се реализира, тогаш ова ќе биде најголемо и оттука според бројот на убиените најскапо отворање масовни гробници во Македонија.
ВМРО-Народна партија: Постојат уште многу неоткриени масовни гробници
ВМРО-Народна партија вчера со соопштение до јавноста го поздравува отпочнувањето на изградбата на меморијалниот центар во Зајас за загинатите и убиените Албанци во 1913 година во кој централно место ќе завзема споменикот ‘‘Албанска мајка‘‘.
Згрозени сме од сознанијата за едно вакво злосторство во кое животот го изгубиле борци кои ги бранеле сопствените семејства но и цивили дури и невини деца. Се прашуваме како едно вакво злосторство со призвук на геноцид досега беше сокриено од граѓаните на Република Македонија.
Ова потврдува дека постојат уште многу неоткриени масовни гробници (најчесто бунари) и на македонци и на албанци кои биле жртви на теророт на српската војска по втората балканска војна.
Зачудувачки е како владата и другите надлежни институции досега ништо немаат превземено да ги расветлат настаните од Балканските војни и првата светска војна каде што се прикрива вистинската улога на српската војска против севкупното население на територијата на Република Македонија кое се борело против српскиот окупатор.
Ја охрабруваме владата доколку има и други сознанија за постоењето на вакви гробници без предрасуди кон никого да ја изведат на виделина вистината за злосторството на Српската војска а не, заеднички да прославуваат јубилеј на српската војска како што беше случајот со Зебрњак, стои во соопштението од ВМРО-НП.