По тродневната посета специјалниот претставник на ОБСЕ, Дуња Мијатовиќ, изрази загриженост за судските процеси кои се закануваат со затворање на некои медиуми како и за нетрасперенитниот процес на дистрибуција на владни реклами.
Мијатовиќ оствари средби со премиерот, Никола Груевски, и министерот за информатичко општество и администрација, Иво Ивановски, на кои разговараше за реформите во јавниот радиодифузен сервис, законот за клевета и маркетингот на јавните институции.
Во текот на посетата на Скопје таа имаше средби и со претставниците на Македонскиот Институт за Медиуми и со Самостојниот новинарски синдикат, при што беше запознаена со исклучително тешката и нефункционална медиумска состојба.
Мијатовиќ ја нагласи потребата од широка и ефективна имплементација на неодамна донесените закони за медиуми и за функционирањето на саморегулаторниот систем.
„Законите се добри. Тие беа подготвени во соработка со експерти од нашата канцеларија. Мијатовиќ рече: „Мило ми е што многу од нашите суштински коментари беа земени предвид“.
„Позитивно е што медиумската фела беше консултирана во текот на подготвувањето на законите“, рече Мијатовиќ. „Вклученоста на сите учесници е единствениот начин да се подобри ситуацијата во медиумите.“
Мијатовиќ повика на имплементација на законите која што ќе придонесе кон промовирање на независноста и ќе обезбеди слобода на мислењето во медиумите. Таа исто така ја посочи функционалната саморегулација како значајна алатка за зајакнување на новинарството.
„Го поддржувам создавањето на општ и независен систем за само-регулација“, рече Мијатовиќ.
Во текот на состаноците со претставници на граѓанското општество и медиумите, Мијатовиќ ја нагласи потребата од солидарност за прашањата од заеднички интерес.
Мијатовиќ исто така се сретна со новинарот Томислав Кежаровски, кој се наоѓа во домашен притвор.
„Задоволна сум што Кежаровски се наоѓа дома и што ми беше овозможено да го посетам. И понатаму ќе продолжам внимателно да го следам случајот“, рече Мијатовиќ.