Нема потреба да се дефинира со закон кој е новинар- порачува претставничката за медиуми на ОБСЕ Дуња Мијатовиќ, објавува Утрински весник.
Преставничката за слобода на медиуми на ОБСЕ, ги поздрави напорите на македонската влада да го усогласи законот што е во процедура со меѓународните стандарди, но нагласи дека некои од деловите и натаму се проблематични и треба да се сменат.
“Со оглед на моменталната состојба со слободата на медиумите во земјата, јас сум загрижена дека ова законодавство би можело да биде употребено за да се замолчат критичките ставови и да се ограничи слободата на говорот. Иако голем број од регулативите се прифатливи, јас сум загрижена дека нивната формулација може да доведе до злоупотреба “, вели Мијатовиќ во специјалното соопштение, и откако од владата известија дека законот е во согласност со барањата на ОБСЕ.
Во писмото испратено до министерот Иво Ивановски, Мијатовиќ вели исто така дека “моќната улога на Агенцијата за медиуми и нејзиниот состав не гарантираат независноста и дека таа може да се меша и во содржината на печатените и онлајн медиуми”. Исто така, таа смета дека постоечките казни во законот се значително високи, недостигаат постапни чекори што на крајот ја зголемува загриженоста дека казните ќе доведат до самоцензура. Исто така, дека референците околу безбедноста, поттикнувањето на омраза или нетрпеливост се премногу нејасни и може да бидат злоупотребени.
“Нема потреба да се дефинира кој е новинар во законот.Дефиницијата е излишна и може исто така да биде искористена за да се исклучат некои медиумски работници и луѓе ангажирани во новинарството, што не е потребно”, вели Мијатовиќ. Според неа, инсистирајќи “мнозинската асоцијација на новинари” да учествува во Агенцијата за медиуми и во Управниот одбор на Јавниот радиодифузен сервис може да создаде тензии меѓу асоцијациите, особено откако има обвинувања за притисок врз новинарите да и се приклучат на одредена од нив. Ова треба да се избегне”, порачува таа во соопштението. На крајот ги поздравува напорите на владата околу законот и изразува надеж дека новиот нацрт закон ќе ја сочува слободата на медиумите и на изразување.