Речиси 900.000 Бразилци, според полицијата, протестираа вчера барајќи од претседателката на Бразил Дилма Русеф да даде оставка поради нејзината вовлеченост во скандали на корупција и економско-политичка криза. Според организаторите, протестирале 2 милиони луѓе.
Во март протестирале 3 милиони луѓе од истите причини.
Протестот го организирало граѓанско движење со поддршка на еден дел опозицијата а протестите се одвивале во повеќе градови.
Граѓаните бараат оставка или деституција на претседателката. На протестот имаше транспаренти на кои пишуваше “Оди си Дилма!” и “Не на корупцијата!”.
“Ќе протестираме до крај. Се до пад на претседателката. Таа мора да си оди и да ја ослободи земјата од мафијата на нејзината Партија на работниците”, изјавиле за АФП граѓаните кои биле излезени на протестот.
Дилма Русеф се соочува со троен скандал. Од една страна тука е економската криза која ја натера владата да воведе мерки за штедење кои не се популарни кај населението.
Освен тоа, беше откриен скандал на корупција околу нафтениот гигант Петробрас во кој е вовлечена левата партија на Русеф. Во скандалот Петробрас се работи за сума од 4 милијарди долари кои биле проневерени од страна на ова јавно претпријатие а постоја сомненија дека овие пари биле префрлени кај политички партии особено оние блиски до владината коалиција на Русеф.
И конечно, земјата се соочува со политичка криза која лесно може да го турне мнозинството во Парламентот.
Русеф е поранешен борец против воената диктатура во Бразил. Таа изјави дека нема да попушти пред притисокот и заканите и потсети дека нејзиниот легитимитет се гласовите добиени на изборите кои биле фер и слободни. Русеф смета дека разноликоста на интересите на опозицијата ќе и помогне да остане на функцијата.
Претседателката ќе мора да се соочи со две процедури. Наскоро судот треба да се произнесе дали владата го нарушила законот во 2014 година со тоа што ги натерала јавните банки да ги платат трошоците на државата.
Освен тоа, суд треба да пресуди дали сметките на изборната кампања на претседателката биле контаминирани со пари на Петробрас. Ваква пресуда би можела да ги поништи изборите одржани во 2014 година и да донесе одржување на предвремени избори.
Аецио Невес, претседателот на Социјал-демократската партија, центар-десно, кој ги загуби изборите пред една година, за прв пат вчера ги повика своите поддржувачи да излезат на протест.
«Доста е од корупција. Мојата партија е Бразил», рече тој.
Од друга страна, еден економист на консултантската фирма Градуал Инвестмен, вели дека средната класа сака да ја бутне Русеф од власт но се прашува: «Но кој да дојде на нејзино место. Газдите на фирмите и елитата сметаат дека ќе биде уште полошо доколу Русеф си замине», вели тој. Според него, во овој период на буџетска криза, отпуштања од работа и мерки за штедење, подобро е левата Партија на работниците да биде на власт отколку и таа да излез на улица да протестира.
Претседателката Русеф има 64 години и има бугарско потекло. Таа пред неполна година го почна својот втор мандат. Но нејзината популарност падна на драматично ниски 8 отсто поддршка.