Министерот за правда на Македонија поднел барање за мислење до Венецијанската комисија за дел од уставните измени кои ги предложи Владата. На веб страницата на Венецијанската комисија информираат дека на 5 Август годинава „министерот за правда побарал од Венецијанската комисија да даде толкување на 7 амандмани од Уставот, пред се на оние кои се однесуваат на на Судскиот совет, надлежностите на Уставниот суд и Државниот завод за ревизија.
Владата до Собранието минатиот месец достави предлог за измена на Уставот со седум нацрт-амандмани кои предвидуваат дефинирање на бракот како заедница на маж и жена, како и дефинирање на вонбрачната заедница; измени во составот на Судскиот совет, менување на името на Народната банка во Македонија; регулирање на фискалната политика во делот на висината на јавниот долг; формирање на финансиска зона; Државниот завод за ревизија да биде независен орган биран од Собранието и менување на надлежностите на Уставниот суд, односно Судот ќе може да одлучува по уставната жалба за човекови права, како и за одлуките на Судскиот совет и Советот на јавни обвинители.
Измените на Уставот предизвикаа многу контроверзи во јавноста, а власта беше на удар на критики поради намерите да го менува Уставот без опозиција и без поголема јавна дискусија.
Собранието веќе расправање по предлогот за пристапување кон измена на Уставот кој што на седница кон крајот на јули беше и изгласан. Претседателот на Собранието Трајко Вељаноски за 25 август ја закажа седницата на Комисијата за уставни прашања. Два дена подоцна треба да се закаже и собраниската седница на која што со 62 или повеќе гласа може да бидат изгласани нацрт-амандманите. Доколку се изгласаат, потоа ќе има 30-дневна јавна дискусија по која што Владата треба повторно до Собранието да достави нови предлог-амандмани со вградени забелешки од дискусијата. Очекувањата се дека постапката за носење на уставните измени треба да заврши до крајот на октомври.
Венецијанската комисија или Европска комисија за демократија низ правото е во состав на Советот на Европа и има советодавна улога и на барање на влади или меѓународни органиации дава правни толкувања на нацрт-закони или закони во сила.