Воден од желбата постојано да биде присутен во медиумите, со надеж дека ќе добие и политички поени, Љупчо Николовски продолжува со своите клевети, манипулации и дезинформации. Наводно загрижен за земјоделците, Николовски изминатиот викенд говореше за, според него, незаконски исплати на АФПЗРР, притоа повикувајќи се на ревизорски извештај од 2014 година, се вели во денешната реакција на Министерството за земјоделство, на наводите на екс дополнителниот заменик министер Николовски за злоупотреби во ова Министерството.
– Иако од Платежната агенција одговорија дека „главните забелешки се корегирани за што сведочи и изјавата на Главниот државен ревизор; дека во ниеден дел од извештајот не е наведено дека средствата се исплатени неправилно, незаконски и не е наведена сума на злоупотребени средства; како и тоа дека Агенцијата работи согласно важечките законски и подзаконски прописи и акти, што е потврдено од страна на сите досегашни ревизии извршени од Европската комисија, надворешните независни ревизии, како и од страна на државниот ревизор“, Николовски вчера повторно со желба да се слика и појавува во јавност, зборуваше за наводно сомнително исплатени 3 милиони евра преку Програмата за рурален развој.
Притоа, исто како пред 6 месеци, ја спомена фирмата Силекс Неметали и тендерот за чистење на канали за одводнување и наводнување од 2014 година.
Ова е уште еден доказ за немањето креативна идеја кај Николовски и неговата желба постојано, макар и со повторување на неосновани обвинувања, да го има по медиумите.
Министерството за земјоделство, пак, ќе потсети дека на тендерот за 2014 година се јавија 18 економски оператори, на јавната електронска аукција учествуваа 15, а четири од нив дадоа најповолни услови односно најниски цени и со нив се склучени договорите.
Секое водостопанско претпријатие определува надзор кој на терен ја следи и ја потврдува извршената работа. Сите извештаи за времени ситуации покрај надзорот ги потпишува и изведувачот на работите, директорот на водостопанското претпријатие и директорот на Управата за водостопанство при МЗШВ.
Уште еднаш ќе потсетиме дека, покрај законската постапка која е спроведена во целост, министерот Михаил Цветков пред исплатата на средствата дополнително формираше Комисија за проверка на изведени работи поврзани со чистењето на каналите за одводнување и наводнување во чии состав покрај членовите од МЗШВ има и членови од други надлежни државни институции. Дополнително формираната комисија беше на терен, состави писмен извештај поткрепен со фото документација со што се потврдува дека сите економски оператори ги извршиле активностите согласно условите во договорите, се вели во соопштението.