Специјализантите по стоматологија денеска излегоа на мирен протест пред Министерството за здравство. Тие бараат финансиски надоместок за нивниот труд, исто како што добиваат приватните специјализанти по медицина. Мирниот протест доаѓа по осуммесечните преговори и ветувањa дека од септември ќе почне исплатата и за нив.
„Имавме повеќе средби , ни ветуваа дека ќе добиеме надомест за нашиот труд и дека тоа ќе почне од септември. Но, на последната средба советникот на министерот ни соопшти дека пари нема“, изјави Елена Лазаровска специјализант по стоматологија.
На Стоматолошките клиники приватно специјализираат 43 ца стоматолози. Тие секојдневно ги извршуваат своите работни обврски со пациенти поради што бараат валоризација на нивниот труд, особено сега на почеток на новиот семестар и подмирување на трошоците за специјализација кон Стоматолошкиот Факултет – Скопје, кои се дополнителен товар на младиот специјализант.
Вчера министерот Филипче изјави дека пари ќе бидат обезбедени и тие ќе почнат да добиваат финансиски надомест од октомври. Специјализантите бараат гаранција за тоа.
„ Ние бараме конкретен договор на писмено за ова ветување. Го поздравуваме ова ветување и се надеваме дека министерот ќе остане на ова што го кажа. Ова е една мерка за нас младите стоматолози да не задржат во државата и да не се иселуваме масовно во странство“, изјави Лазаровска во име на сите приватни специјализанти по стоматологија.
Претходно, тие му испратија Oтворено писмо на премиерот Заев за кој велат дека им е последна надеж дека ќе го реши нивниот проблем за да имаат рамноправен, правичен и еднаков третман сите приватни специјализанти.