Мисијата на Меѓународниот монетарен фонд оцени дека зголемените трошења од буџетот од почетокот на годината за плати за полициските сили и дополнителните расходи произлезени од влошената безбедносна ситуација од една страна, и послабата наплата на ДДВ и неданочните приходи од друга, ќе го зголемат дефицитот на од 3,4 отсто на околу 4 отсто од домашниот бруто производ (БДП).
„Ребалансот на буџетот кој моментално се разгледува треба да ги идентификува мерките за надоместување, вклучувајќи и намалување на трошоците за стоки и услуги и субвенции, како и собирање на заостанатите даноци, а сите приходи поголеми од планираните треба да се зачуваат за да се обезбеди фискален резултат што во голема мерка ќе биде во согласност со првичниот буџет“, оценува ММФ по еднонеделното скенирање на економијата во земјава.
ММФ препорача власта да намали со темпото на трошење на јавните пари во наредниот период за да обезбеди намалување на дефицитот во буџетот под 3 отсто од БДП.
„Во отсуство на какви било промени во даночните стапки, консолидацијата ќе бара зголемување на ефикасноста во наплата на ДДВ, што е ниска според регионалните стандарди, и намалување на социјалните трошоци и трансфери врз основа на темелна проценка на јавните расходи“, стои во препораката.
Според ММФ, економијата во земјава е под притисок на политичката криза и кризата во Грција, и затоа ќе забави нејзиниот раст.
Проценката е дека економијата годинава ќе оствари раст од 3,2 отсто, кој пак има основа во инвестициите во јавната инфраструктура, силниот раст на кредитите, подобрувањето на пазарот на работна сила и извозот.
„Властите треба да прават континуирани напори за обезбедување полесен пристап до кредити за приватниот сектор, скратување на задоцнувањето на наплатата, вклучувајќи ја и наплатата од јавниот сектор, повеќе предвидлива законска и регулаторна рамка, како и понатамошното поедноставување на улогата на бројни инспекциски тела“, потенцира ММФ.
Сепак добри оценки од ММФ доби монетарната власт и финансискиот сектор кој е оценет како здрав. Банките, вклучувајќи ги и двете грчки подружници, се добро капитализирани.