Партијата ВМРО-ДПМНЕ вечерва ја продолжи изборната кампања во Ресен кадешто го претстави кандидатот за градоначалник на овој град – Јован Тозиевски и ја побара поддршката од граѓаните за него.
Лидерот на ВМРО-ДПМНЕ, Христијан Мицкоски, на вечерашниот митинг од Преспанскиот крај изјави дека „нема да кажувам дека во Ресен првпат сум се заљубил, сум имал девојка првпат тука, тоа ќе ви го каже еден друг“.
– Тој кој што вчера овдека се паркираше со најнова марка на патничко возило БМВ, од прилика пресметавме е еднакво колку 3 милиони килограми јаболка од прилика толку чини тоа возило, рече Мицкоски вечерва пред ресенчани.
Тој на митингот додаде дека „луѓето се демотивирани, деморализирани, полни со апатија за тоа што гледаат дека на власт е политичка елита која што не само што не знае каде тера туку никогаш ниту пак имала амбиција да го покаже вистинскиот пат кон иднината“.
– Единствената нивна амбиција е што повеќе тендери да си доделат ним, на нивните пајташи, што повеќе пари од народот да украдат, што повеќе злоба и пакост да нанесат, што повеќе срам и понижување да му причинат на овој народ – рече претседателот на ВМРО-ДПМНЕ, Мицкоски.
Мицкоски пред да се обрати на граѓаните на Ресен, вечерва им порача на стружани:
– Треба да градиме пактови и сојузи кои ќе нѐ носат кон иднината, бидејќи сите македонски граѓани делат иста мака, потребно е создавање на заедничка борба за подобра држава и подобра иднина, каде нема да има неправди, криминал и корупција – рече лидерот на ВМРО-ДПМНЕ.
Кандидатот за градоначалник на Општина Ресен од ВМРО-ДПМНЕ, Јован Тозиевски, вечерва пред сограѓаните изјави дека „до поуспешна и попросперитетна општина се стигнува само со труд, љубов и желби, но и со луѓе кои ги застапуваат вистинските вредности и ја сакаат Преспа“.
Тозиевски откри и дел од програмата и проектите коишто планира да ги спроведе како градоначалник, а дека ќе го нагласи она што е бренд за Преспа – преспанското јаболко, со чие производство се занимаваат голем број земјоделци од оваа општина.
– Јаболкопроизводителите треба да си го добијат заслуженото и дека тоа ќе се постигне само доколку локалната самоуправа биде нивни партнер преку привлекување на инвеститори и отворање на нови центри за откуп и преработка на јаболкото. Да се работи на привлекување на инвеститори, нови центри за откуп како и преработка на јаболкото. Да го направиме Ресен „Smart City“ преку воведување на повеќе дигитални услуги – рече Тозиевски.
Тој вечерва кажа и „ќе ја направиме нашата општина модерна и инфраструктурно поврзана преку решавање на проблемот со недостаток на паркинг места, асфалтирање на повеќе градски и селски улици, реконструкција на водоводната мрежа, решавање на недостатокот на вода за пиење“.
А потпретседателот на ВМРО-ДПМНЕ, Владо Мисајловски, денеска во општина Бутел изјави дека нивниот кандидат за градоначалник, Дарко Костовски, победува во општина Бутел и дека на таа општина и се потребни итни реформи.
Коалицијата предводена од ВМРО-ДПМНЕ изборната кампања „Создади нова иднина!“ утре ќе ја претстави на градските плоштади во Демир Капија, во Неготино и во Кавадарци.