Митрополит Методиј од Американско-канадската патријаршија на Македонската православна црква вчера во Вашингтон имаше средби со конгресмените Кендис Милер од Мичиген и Бил Паскрел од Њу Џерси.
– Конгресмените Милер и Паскрел се големи пријатели на Македонската православна црква и ми беше чест во име на сите македонски верници во САД повторно да се сретнам со нив и да им ја пренесам нашата благодарност за нивната безусловна поддршка на Македонија, изјави митрополитот Методиј по средбите. Конгресмените претставуваат изборни единици со голем број Македонци и се членови на групата за соработка со Македонија во американскиот Конгрес.
На средбата, како што јави дописникот на МИА, митрополитот со конгресмените разговарал за плановите за формирање на нови црковни заедници во САД, во Бостон, Сан Диего и во Вашингтон. Митрополит Методиј со Милер и Паскрел разговарал и за програмите на МПЦ за учење на македонскиот јазик и за веронаука.
Методиј ги покани конгресмените Кендис Милер и Бил Паскрел да ја посетат македонската црква „Свети Петар и Павле“ во Краун Поинт во Индијана, која каде годинава се навршуваат 50 години од изградбата и осветувањето на овој прв македонски храм во дијаспората.
Митрополит Методиј е во Вашингтон за лидерската конференција на Обединетата македонска дијаспора, која почнува денес. Предвидено е учесниците на конференцијата, меѓу кои има претставници на македонските здруженија низ САД и истакнати Македонци од САД и од Канада, да имаат средби со поголем број на американски политичари.