„Народот јасно кажува не, народот е јасно против ова што ѝ се прави на Македонија, на идентитетот на македонскиот народ. Задоволни сме од досегашните случувања, бидејќи и во ова време има будење кај народот и народот застанува да си го брани она што смета дека му е загрозено”, порача лидерот на ВМРО-ДПМНЕ, Христијан Мицкоски од денешниот деветти протест против модифицираниот француски предлог за деблокада на македонските евроинтеграции и отпочнување на процесот на преговори за членство во Европската унија (ЕУ).
Демонстрантите и денеска тргнаа од пред Владата во 19 часот, но наместо покрај Министерството за правда, како што беше случај во изминатите неколку дена, ја сменија рутата и по пет дена повторно минаа крај плоштадот „Скендербег“ и Министерството за надворешни работи до крајната дестинација, пред Собранието.
„Оваа сага, конечно, треба да прекине. Во 21-от век Македонците повторно се борат за својот идентитет. Тоа нема никква врска ниту со европските вредности, ниту со Европа. Тоа е суштината и затоа народот е на улица веќе 11 дена и протестира“, рече лидерот на опозициската партија на вечерашниот протест под мотото „Ултиматум – Не, благодарам“.
Запрашан за материјалите за 80-тата седница на Собранието, на која се очекува да се расправа за Информацијата за предлог преговарачкатра рамка што ја достави Владата, Мицкоски одговори:
„Протоколот сè уште не е на дневен ред, ниту пак некој знае што вклучува тој Протокол. Тој е суштински документ. Протоколот ниту е доставен, ниту пак мислам дека ќе го достават“.
Во однос на најавената посета и обраќањето на претседателката на Европската комисија (ЕК), Урсула фон дер Лајен на собраниската седница в четврток, Мицкоски рече дека секој гостин што ќе дојде од надвор е добредојден.
„Се надевам дека госпоѓата Фон дер Лајен, која што доаѓа од нашето исто семејство, тоа е Европската народна партија, ќе ги слушне мислењата и на пратениците на ВМРО-ДПМНЕ која е нејзина сестринска партија. Ќе остане малку повеќе, нема само да се обрати, туку ќе остане да ги слушне и нашите аргументи. Тоа е суштината. Секој е добредојден, сакаме да слушнеме што мислат, но сакаме и да нè слушнат што мислиме. Тоа е демократијата и тоа се вистинските европски вредности. И конечно, документот за кој зборуваме, тоа е една страница хартија, нема никакво формално значење, бидејќи може да се усвои со 41 пратеник“, изјави Мицкоски додавајќи дека за него е нелогично Протоколот прво да биде потпишан, а потоа да биде објавен.
С.Д.