Коалицијата предводена од ВМРО-ДПМНЕ денеска ја претстави својата програма „Создади нова иднина“ пред граѓаните на Македонска Каменица, Пехчево, Делчево и Берово. Од централниот митинг во Берово, претседателот на партијата, Христијан Мицкоски кажа дека „громогласниот молк на тивкото мнозинство на изборите ќе се трансформира во огромен народен тресок“.
-Го слушав вчера Зоран Заев како вели ќе победел во 22 општини во првиот круг, а ВМРО-ДПМНЕ само во 6. Ова ми личи на онаа анегдота кога отишол некој да бара работа и на интервју за работа се пофалил дека брзо смета, па кога го прашале колку е 24 по 12 одговорил милион, затоа што го прашале дали знае брзо да смета, а не точно. Така е и приказната на Заев, рече лидерот на ВМРО-ДПМНЕ, Христијан Мицкоски.
Тој укажа дека ова се локални избори со суштинска важност за правецот по кој ќе се движи државата, односно избори каде граѓаните со својот глас праќаат порака до власта.
-Вашиот глас на овие избори е порака до тие кои што ја водат земјава 52 месеци. Дали сакате да владеат со апсолутната власт уште 4 години или сакате промени, праша Мицкоски.
Можеби не сум совршена, но сум храбра, како жена и како мајка да се борам за мојот град, да се борам да остануваат нашите деца тука, да им помагам на луѓето, нешто што во континуитет го правам веќе долги години, зошто така сум учена и така сум воспитувана и не сакам да бидам само нем набљудувач за се што ни се случува. Затоа го направив овој чекор, кандидат за градоначалник, зошто сигурна сум дека можам да дадам свој придонес во мојот град, кажа кандидатот за градоначалник на општина Берово, Елеонора Рашкоска на митингот.
Рашкоска посочи дека нејзината визија за Берово е да го врати стариот сјај кој го имаше, повторно да биде град на боеми, занаетчии и еснафи, град на културата, град во кој повторно ќе го има „Беровското културно лето“, град кој ќе има добра инфраструктура и со сите услови кои се еквивалент за услови на 21-ви век.
Да се биде градоначалник на една општина е голема одговорност и ќе ми биде чест и задоволство да работам во служба на моите сограѓани, да ја направиме општината Пехчево подобро и помодерно место за живеење, истакна кандидатот за градоначалник на општина Пехчево, Александар Китански.
– За да докажеме дека не сме исти, гарантираме реализација на проектите кои се наоѓаат во нашата програма, од кои како приоритетни области ги издвојувам економијата преку која општината ќе ја издигнеме економски и ќе овозможиме подобар животен стандард на сите наши граѓани. Да ја подобриме инфраструктурата во општината и да ја зголемиме мобилноста на граѓаните за побрзо и поефикасно поврзување во патната инфраструктура. Исто така ви нудиме неколку проекти како нов оддржлив концепт за урбанизација и домување. Модерното и современото образование за младите од општината исто така е еден од многуте важни приоритети за нас, рече Китански.
Денеска заеднички создаваме почеток на една нова приказна за нашето Делчево. Тоа ќе биде приказна на заедништво, приказна на разбирање и толеранција, приказна за многу нови проекти, за успех на секој граѓанин на Делчево, истакна кандидатот за градоначалник Николчо Стојменовски.
– Ќе посветиме огромно внимание, знаење и енергија во суштинскиот локален економски развој на Делчево. Оваа планина Голак, оваа река Брегалница се наше непроценливо природно богатство, но пред се огромен потенцијал. Туристичкиот локалитет Голак ќе го добие реконструирано и функционално детско одмаралиште, подобрено водоснабдување и решени имотно-правни проблеми кои го кочеа неговиот развој. Ќе создадеме нова општинска индустриска развојна зона во Делчево со поволности за сите идни инвеститори. Ќе ја развиеме и докомплетираме постојната сервисна зона, рече Стојменовски.
Ние гледаме кон иднината, кон едно посветло поглавје во историјата на Македонска Каменица, истакна кандидатот за градоначалник на ВМРО-ДПМНЕ, Димчо Атанасовски. Тој посочи дека ќе се изгради рекреативен центар со содржини за млади и возрасни лица. Ќе се распише и тендер за набавка на медицински услуги за специјалист интернист, очен лекар, педијатар и други доктори, кои по претходно утврден распоред во соработка со граѓаните, ќе им пружаат бесплатни здравствени услуги на нашите сограѓани во здравствената станица и/или во селските средини.
Атанасовски најави изработка на стратегија за долгорочен економски развој на општината која ќе го трасира патот за долгорочен економски развој и создавање на здрава основа за враќање на иселениците во нашата општина, изградба на пензионерски дом и промоција на Македонска Каменица како место каде граѓаните можат да ги живеат пензионерските денови, изградба на станбена зграда за субвенционирано социјално живеење, како и парична помош за социјално ранливи лица.