Лидерот на ВМРО-ДПМНЕ Христијан Мицкоски најави дека во деновите што следат ќе се отворат преговори со сите политички субјекти, по што ќе се види како ќе се одвиваат работите за формирање нова влада. Тој рече дека е подготвен да разговара со сите политички партии, но оти тоа нема да го прави под уцена и условување.
-Подготвен сум да преговарам бидејќи кредибилитетот кој го носи ВМРО-ДПМНЕ за овие избори е најголем, но она што не сум подготвен да преговарам е условот. Јас под диктат не работам, рече Мицкоски на денешната прес-конференција, одговарајќи на новинарско прашање дали би го прифатил условот на ДУИ за премиер Албанец.
Лидерот на ВМРО-ДПМНЕ не сакаше да каже дали вчеравечер контактирал со некој од лидерите на партиите од албанскиот блок.
-Не направивме предизборна коалиција со политичките партии од албанскиот блок, но не значи дека нема да направиме постизборна коалиција. И во 2016 и овој пат, коалицијата на ВМРО-ДПМНЕ има повеќе пратеници од коалицијата на СДСМ. Додека народот ја дава поддршката за ВМРО-ДПМНЕ, ние ќе се бориме за народот, додаде Мицкоски.
Во врска со предлогот на лидерот на СДСМ Зоран Заев за меѓусебна поддршка со пратеници за евентуално формирање влада, Мицкоски потенцира дека нема намера тоа да го направи.
-Јас како што кажав и за време на предизборна кампања со луѓе осомничени за криминал немам намера да коалицирам, истакна тој.
Прашан дали е запознаен со тоа дека се појавиле одредени информации за несогласување на резултатите од записници од одредени гласачки места со оние објавени на ДИК за истите места, рече дека за тоа разговарал и со претседателот на ДИК Оливер Деркоски.
-Има повеќе такви случаи. Разговарав со претседателот на ДИК. Врз основа на тој разговор што го завршив со него добив уверување дека се прегледува записник по записник и дека во текот на денот ДИК ќе излезе со конечен став бидејќи вчера биле цел на хакерски напад. Од она што ми го кажа денеска попладне по разгледување на сите записници ќе има јасна претстава за резултатите, истакна Мицкоски.
Најави дека правна комисија на партијата работи на евентуални приговори за кои има рок од 72 часа да се достават до Комисијата, и оти до вечер или до утре ќе се знае дали и на кои места партијата ќе поднесе приговори.
Мицкоски, одговарајќи на новинарско прашање истакна и дека резултатите говорат оти политичарите го разочарале народот, но оти за тоа биле свесни и претходно во кампањата.
-Народот е разочаран од политичарите тоа го зборував и во кампањата. Сите треба да извлечеме поука и повеќе да не го разочаруваме. ВМРО-ДПМНЕ и јас лично ќе направам сериозна и детална анализа во кои делови лично јас и партијата сме го разочарале. Ќе се корегираме и ќе видиме како ќе се одвиваат настаните, рече лидерот на ВМРО-ДПМНЕ.